Вуйлатыше шкеак эскера

31 октябрьыште Марий Эл правительстве председательын икымше алмаштышыже Евгений Кузьмин «Здравоохранений» национальный проектым илышыш пуртымо йодыш дене совещанийыште участвоватлен. Тудым видеоконференций йӧн дене Россий Федераций правительстве председательын алмаштышыже Татьяна Голикова эртарен.

Тений Марий Элыште нацпроектын регионысо проектше-влаклан чыла тӱрлӧ финансирований кӱшеш 1,9 млрд. теҥгем ойыраш палемдыме. Тачысе кечылан 1,5 млрд. наре теҥгем уже кучылтмо.

«Здравоохраненийын первичный звеножым модернизироватлымаш» регионысо проектым илышыш пурташлан 468 млн. теҥгем колташ палемдыме. Тыгак здравоохраненийын кызыт улшо ныл тошто объектшым у дене вашталташ пунчалме, тиде пашалан 180 млн. теҥгем колтымо. Кум объектыште: Кокшайск да Силикатный врачебный амбулаторийлаште, тыгак Тат-Китне фельдшер-акушер пунктышто – чоҥымо да монтироватлыме пашам мучашлыме. Тылеч посна Юрино районысо больницын поликлиникыжым чоҥымо паша умбакыже шукталтеш.

2024-2025 ийлаште Л.И.Соколова лӱмеш Йошкар-Оласе йоча городской больницын 2-шо №-ан йоча поликлиникыжым чоҥаш палемдыме. Кызыт объектын проект документацийжым кугыжаныш экспертизыш колтымо.

2023 ийыште Республиканский клинический больницын консультацийым пуымо да диагностикым ыштыме офтальмологический отделенийжым олмыкташ 38 млн. теҥгем кучылташ палемдыме.

Медицине организацийлашке 15 медицине оборудованийым налме, тидлан 197,6 млн. теҥгем кучылмо.

Национальный проектын шукталтмыжым Марий Элым вуйлатыше Юрий Зайцев шкеак эскера.


Марий Эл Республикым вуйлатышын информаций паша шотышто пӧлкажын уверже негызеш М.ИВАНОВА ямдылен