Вучен шуктышна: кок у троллейбус маршрутыш лектын

Вучен шуктышна: кок у троллейбус маршрутыш лектын
02.09.2014
Марий Элым вуйлатыше Л.Маркелов «Троллейбус транспорт» муниципальный предприятийын эн сай кок водительжылан Саратов область Энгельс оласе Урицкий лӱмеш заводышто лукмо у троллейбус-влак деч сравочым кучыктен. Волгыдо кок электротранспортын ӧрдыжыштыжӧ Йошкар-Олан символикыже сӱретлалтын, «Йошкар-Олалан 430 ий» манын возалтын.
 
Кажне троллейбус вич миллион теҥгем шога, тыгай моделян рӱдолаштына але марте лийын огыл. Кӱварже лапка, пассажир-влаклан, поснак инвалид-шамычлан, пураш да лекташ йӧнан. Троллейбус чыла шотыштат жаплан келшыше. Тушто чумыр техникын пашажым эскерыше электронный увер табло вераҥдалтын. Тудо капитально олмыктымо деч посна лучко ий ыштен сеҥа, эшеже чыла экологический стандартлан келшен толеш. 27 пассажирлан шинчын кудалаш вер уло, а чылаже салоныш 100  еҥ шыҥа.
 
Предприятийын пашаеҥже-влак дене кутырымыж годым Л.Маркелов палемден: нине кок троллейбус – рӱдоласе общественный транспорт паркым уэмдыме шотышто республикысе программын ик ужашыже гына.
 
- Таче ме олалан кок троллейбусым пуэна, шушаш ийыште эше визытым налаш шонена, - манын республикым вуйлатыше. – Кугыжаныш троллейбус паркын подвижной составшын материально-технический базыжым уэмдымаш – республикысе власть ден муниципалитетын калыкын илышыжым саемдымаш верч тыршымыштын сай примерже.
 
Водитель-влаклан сравочым кучыктымеке, Марий Элым вуйлатыше транспортын салонжым, качествыжым да пассажир-влаклан йӧнан улмыжым аклен, водительын верыштыже шинчен ончен.
 
Тачысе кечылан «Троллейбус транспорт» МП-ын паркыштыже 137 электротехнике рӱдоласе маршрутлаш лектеш. Кок у троллейбус, нунын деке ушнен, эн шуко пассажир-влак коштмо 2-шо ден 11-ше маршрутла дене кудалыштыт.
 
Марий Эл Республик Вуйлатышын мер кыл ден увер виктемже
Кусарымаш - А.Андреев (газет "Марий Эл")