Вознесенский кӱварым олмыктен шуктат

Марий Эл вуйлатыше Юрий Зайцев Вознесенский кӱварыште паша кузе кайымым ончен савырнен, 2023 ий шыжылан олмыктен шуктышаш моло корно участке-влак нерген йодышым каҥашен.

Йошкар-Олан рӱдыжым да Изи Какшан эҥерӱмбалым ушышо ты кӱварым 1991 ийыште чоҥымо. Тылеч вара ик ганат олмыктымо огыл. Россий Федераций президент Владимир Путинын тӱҥалтышым пыштыме «Сай качестван лӱдыкшыдымӧ корно» нацпроектлан кӧра объект ыштышаш паша радамыш пурталтын.

Кӱварын кутышыжо – 141,3 метр, тӱҥалтышыжге-мучашыжге шотлаш гын, 161,3 метрыш шуэш. Контрактын акше – 245,5 миллион теҥге. Проект почеш тошто конструкцийым уэмдат, меҥгылам да кӱвар кутышеш шуйнышо ужашлам олмыктат.

Асфальтым август мучаште шараш палемдыме. Кӱвар йымалысе пашам 2023 ий октябрь марте ыштен шуктышаш улыт.

Республикын транспорт да корно озанлык министрже Александр Герасименко кӱвар гоч автомашина-влаклан кудалышташышт корно 1 сентябрьыште почылтеш манын ӱшандарен ойлен. «Паша график почеш шукталтеш. Кок подрядный организаций тырша» , – каласен тудо.

Регион вуйлатыше йогын вӱд пурымо канализаций шотышто рашемдаш йодын..

Минтранс министр кӱвар сооруженийым чоҥымо, олмыктымо але пужен чоҥымо годым кумдан кучылталтше дренаж системын устройствыжым ончыктен. Дренаж брикет-влак пролётла коклаште погынышо вӱдыжгым шупшмылан кӧра вӱд погынышаш огыл.

Вознесенский кӱварыште да корно чоҥымо моло объектлаште пашам палемдыме срокышто шуктыман, палемден Юрий Зайцев.

 

Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен