Ветеран дене пырля мурен

Марий Элым вуйлатыше Юрий Зайцев Кугу Отечественный сарыште участвоватлыше ӱдырамаш дене пырля мурым мурен.

18 августышто Алевтина Федоровна Черепанова 100 ияш юбилейжым палемден. Тудо Кугу Отечественный сар ийлаште, кокытеланыде, элым аралымашке шогалын.

Лӱмгече озам Марий Эл вуйлатышын лӱмжӧ дене правительстве председательын алмаштышыже Ольга Бадма-Халгаева саламлаш миен. Юрий Зайцев телефон дене кылым кучен да юбилярлан шке тыланымашыжым каласен.

«Пайремда дене уло шӱм-чонем дене саламлем, пеҥгыде тазалыкым да эше ик шочмо кечым веле огыл мемнан дене пырля вашлияш тыланем. Алевтина Федоровна, тендан Кугу Отечественный сар ийлаште юж оборонышто лиймыдам, Москвам аралымыдам палем. Ӱдырамашлан, а тунам – самырык ӱдырлан, неле лийын гынат, Те сеҥенда да героизмым, лӱддымылыкым, шкем чаманыдымашым ончыктенда. Сар гыч пӧртылмекыда, элыштына экономике шаланыше лийын. Тендан гай самырык-шамыч пашам ышташ тӱҥалында, Российым тӱнямбалысе кугу кучемыш савыренда. Тидлан Тыланда пеш кугу тау. Кызыт ме адакат фашист тӱча дене кредалына да тудым обязательно сеҥена», – манын тудо.

Сарын участникше Марий Элым вуйлатышылан пырля муралташ темлен. Юрий Зайцев Алевтина Федоровнан ойжо дене келшен да «Не стареют душой ветераны» композиций гыч ужашым пырля мурен.

А.Черепанова сар да тудын деч варасе ийлам шарналтен.

Алевтина Федоровна шым классым тунемын пытарымыж деч вара Киров область Санчурск районысо «8 Март» колхозын лудмо пӧртшым вуйлатен, а Кугу Отечественный сар тӱҥалме жаплан клуб вуйлатыше лийын.

1941 ий 30 сентябрьыште Кугу Отечественный сарын ик эн кугу сӧйжӧ-влак кокла гыч иктыже – Москва верч кредалмаш – тӱҥалын. Тиде неле жапыште элна самырык ӱдыр-влакымат эрык верч кынелаш ӱжын. 1942 ий кеҥежым Алевтина Федоровнат фронтыш каен. Изирак командирын курсыштыжо кум тылзе тунемме деч вара тудым юж обороно постын Москвасе 1-ше корпусшын командиржылан шогалтеныт. Нуно олам касвелне да йӱдвел-касвелне араленыт.

Алевтина Федоровна шочмо ялышкыже 1945 ий кеҥежым пӧртылын, марлан лектын. Икмыняр жап гыч Йошкар-Олашке илаш куснен. Пелашыже Сергей Максимович дене коктын кок эргым ончен куштеныт, нуныжо ача-аваштлан вич уныкам пӧлекленыт.


Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен