Вашкылым вияҥдаш мутланен келшеныт

10 августышто Марий Элыш Китай Калык Республик гыч делегаций толын. Тудым КНР-ын Казаньыште Генеральный консулжо Сян Бо вуйлатен.

Юрий Зайцев республиклан тӱткышым ойырымыштлан уна-влаклан тауштен да шукерте огыл Китайыш мийымыж, КНР-ын провинцийже-влак дене вашкылым вияҥдаш палемдыме нерген ойлен.

Марий Эл вуйлатыше каласен: Китай дене вашкылым вияҥдымаш – республикын правительствыжлан ик эн кӱлешан йодыш.

– Мыйын шонымаште, Китайыште могай технологийым, компонентым ыштат, мемнан производствым вияҥдымаште кучылташ тӱҥалшаш улыт, – палемден тудо .

Юрий Зайцев тыгак каласен:

– Ме транспорт да турист инфраструктурым, унагудо бизнесым вияҥдаш, инвестор-шамычым кумылаҥдаш тыршена. Китайыше илыше-влакымат шкенан деке унала ӱжнена.

Вес направлений – студенческий образовательный вашкылым вияҥдымаш. Ме шкенан ӱдыр-рвезына-влакын Китайыш колташ тӱҥалаш ямде улына. Тек нуно тушто китай йылмым тунемыт, тӱвыра дене палыме лийыт. Мемнан коклаште келшымаш пеҥгыдемшаш.

Сян Бо Марий Эл ден Китайын провинцийже-влак коклаште вашкылым пеҥгыдемдаш полшаш ямде улмыж нерген ойлен.

– Тендан сӧрал республикышкыда да мотор олашкыда толмылан мый куаненам. Тыште кужу жап ышна лий гынат, ужым: регион вияҥеш. Ӱшанем, Тендан вуйлатыме дене Марий Эл эшеат кугу сеҥымашыш шуэш. Мыйын тышке толмо тӱҥ цель – республик дене сайынрак палыме лияш, паша кыл-влакым пеҥгыдемдаш, вашла пайдале кылым вияҥдаш, Тендан Китайыш мийымыда годым ме мо нерген мутланен келшенна, тудым илышыш пурташ, – каласен Сян Бо.

Марий Эл правительствын еҥже-влак ден Китай Калык Республикын Казаньыште Генеральный консульствыжын представительже-шамыч сату оборотым ешарышаш, ялозанлык, тӱвыра шотышто, образований, моло гуманитар сферыште вашкылым ыштышаш нерген радамлын мутланеныт.


Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен