Марий Эл вуйлатыше Юрий Зайцев Шанхай организаций эл-влак дене вашкылым вияҥдыме да сеҥымаш-влак нерген каласкален.
Челябинскыште Руш экономике форум пашажым тӱҥалын. Ик эн тӱҥ мероприятийлан пырля пашам ыштыме Шанхай организацийыш ушнышо элласе регион-влакын вуйлатышыштын Форумын национальный ужашыштыже эртыше заседанийжым шотлыман. Тушто Марий Эл вуйлатыше Юрий Зайцеват лийын.
Заседаний годым промышленностьышто, ялозанлыкыште, логистикыште, туризмыште пашам пырля ыштымым вияҥдыме, тыгак жаплан келшышын, транспорт-логистике корно, калык дипломатий йодышым тарватыме.
Форумын участникше-влакым Челябинский областьын губернаторжо Алексей Текслер саламлен. Тудо палемден: Национальный ужашын заседанийже кумшо гана эрта да поро йӱлашке савырнен.
Марий Эл вуйлатыше Юрий Зайцев докладыштыже палемден: ШОС член-влак радамыште шотлалтше республик ден эл-влак дене пашам пырля ыштымаш тӱрлӧ йогын дене вияҥеш. Мутлан, Марий Эл Республик ден Казахстан Республик коклаште 2022 ийыште ужалыме оборот 47,9 миллион долларыш шуын. Тидыже ужалыме чумыр обортын 15,1 процентше лиеш. Экспортын ужалыме структурыштыжо тӱҥ ужашым шем металл, оборудований ден механический устройстве, пушеҥге да тудын гыч ямдылыме сату айлат.
Кызыт Марий Эл Китай Калык Республик дене торгово-экономичесикй кылым вияҥден толеш. Эртыше ийын гына Марий Эл ден Китай коклаште внешнеторговый оборот 66,4 миллион долларыш шуын. Тений тудо пелийыште 41 миллион долларым эртен. Экспортын тӱҥ ужашыжым пушеҥге, шыл ден шыл субпродукт айлат. Марий Эл Китай деч оборудований ден механический устройствым, пластмассым, электрооборудованийым, нунын ужашыштым конда.
Регион вуйлатыше ушештарен: тудо Россий Федерацийын Федеральный Погынымашыжын делегций составыштыже парламентын кӱшыл палатыжын Председательже Валентина Матвиенкон вуйлатымыж почеш КНР-ыш визит дене миен коштын. Визит кышкарыште икмыняр кӱлешан вашлиймаш эртен. Тушто Марий Элын промышленный, культурный да турист вий-куатыше дене палдарыме. Тыгак пашам пырля ыштыме торгово-экономический йодыш-влакым каҥашыме, технологий дене ваш палдарыме, пырля производствым ыштыме йӧн-влак нерген ойлымо.
Кызыт образовательный программе-влакым пырля ямдылыме, студент ден преподаватель-влакым вашталтыме шотышто мероприятий-влак илышыш шыҥдаралтыт. Мутлан, Китай гыч студент-влакым республикын кок кугу вузыштыжо туныктат. Нине тунемме тӧнеж-влакын научный базышт пеҥгыде, тушто шуко отрасльлан у технологий-влак ямдылалтыт.
Республикнан еҥже-влак Россий-Китай молодежный форумышто чӱчкыдын лийыт. Тыште дистационный формат дене республикнан кӱшыл шинчымашым пуышо тӧнежше гыч студент-влак участвоватлат. Тушто науко ден инноваций, молодежный предпринимательстве, образований, туризм, тӱвыра ден сымыктыш йодыш-влак авалталтыт.
Тӱвыра сферыштат кыл пеҥгыдемеш. 7 гыч 18 июль марте Эрик Сапаев лӱмеш опер да балет Марий кугыжаныш академический театр Китай Калык Республикыште гастроль дене лийын.
Марий Эл Республикым вуйлатышын администрацийжын информаций паша пӧлкажын уверже негызеш В.СМОЛЕНЦЕВ ямдылен
