Вараксин кӱвар почмым чыланат вучат

Вараксин кӱвар почмым чыланат вучат
02.08.2021

Марий Элым вуйлатыше Александр Евстифеев республикын Транспорт да корно озанлык министрже Александр Герасименколан Вараксин кӱварым олмыктымо пашам писемдаш да август тылзе тӱҥалтышлан мучашлаш порученийым пуэн. Пашам тӱҥалме годым жапым 15 августым палемдыме.

«Единый Россий» партийын общественный приёмныйышкыжо Варксин кӱвар шотышто ятыр йодыш пура. Минтранс да подрядчикна-шамыч тугакшат кӱлеш семын тыршат. Кӱварым кӱчык жапыште шотыш кондат, качестве шотышто коктеланаш амал уке. Регионым виктарыше рӱдер тӱрлӧ вере, тиде шотышто социал сетьыштат, шагат-пик годым Вараксин кӱвар гоч кудал эртыме годым лекше нелылык лекме нерген каҥашымашым эскерен шога. Тидыже моло кӱварлаштат йӧндымылыкым луктеш. Пашам писемдена. Каныш кечылаште огына кане, лиеш гын, йӱд-кече пашам ыштена, но август тӱҥалтыште кӱварым почаш да ласкан кудалышташ йӧным ышташ йодам. Мутат уке тидым пудыртылмаш деч посна шуктыман», – каласен Марий Эл вуйлатыше.

Йошкар-Оласе Вараксин кӱварым олмыктымо паша «Качестван лӱдыкшыдымӧ корно» нацпроект почеш ышталтеш. Кужытшо 123  метрыш шуйна.

Йошкар-Оласе Водопроводный урем велым Вараксин кӱвар деке кондышо корным тений ачалыме, республикын правительствыжын полышыж дене Шернур кугорным шотыш кондымо. Тыге  аварий лийын кертме лӱдыкшан кӱвар кок олмыктымо участке коклаште верланен. 3 июльышто тудым транспортлан кудалышташ да йолешкылан кошташ петырыме. Тиддеч вара олмыктымо паша ик кечыланат чарнен шогалын огыл.

Марий Эл Республикым вуйлатышын  организаций да аналитике виктемжын уверже негызеш  Л.СЕМЕНОВА ямдылен