Звенигово, Морко, У Торъял, Юрино да Килемар районлаште вӱдым ситарыме 11 объектым чоҥат да уэмден ачалат.
Эртыше арнян Марий Элым вуйлатыше Юрий Зайцев Россий Федерацийыште регион-влакым вияҥдыме шотышто правительственный комиссийын президиумжын заседанийыштыже участвоватлен. Тушто элнан субъектлаштыже национальный ден федеральный проект-шамычым илышыш пуртымо нерген мутланеныт. Заседанийым Россий правительстве председательын алмаштышыже Марат Хуснуллин вӱден.
Вице-премьерын мутшо почеш, чоҥымо аланыште шумо кӱкшытлан элнан президентше Владимир Путин сай акым пуэн.
«Пытартыш ийлаште чоҥымо аланысе паша кугу шырым дене кая. Кум ийыште тудым 15 процентлан шукырак шуктымо. Тиде регион-влакын, правительствын да чоҥышо чыла организацийын тӱшкан шуктымо кугу пашашт. Ме кӱкшӧ шырымым налынна. Нуным шукташ куштылгыжак огыл, а арален кодаш эшеат неле», – палемден М.Хуснуллин.
Килемар районысо Визымйӓр посёлкышто да Церкӹсола селаште «Яндар вӱд» федеральный проектым илышыш пуртымо кышкарыште вӱд пучым шупшмо паша мучашке лишемеш. Тидлан 42 миллион наре теҥгем кучылтмо. Кызытысе вӱд пуч корно-влак 1970 ий годсек кучылталтыт да 70 утла процентлан пытеныт. Сандене у объект-шамыч палемдыме илем-влаклан моткочак кӱлыт. Нуно 1750 еҥлан сай качестван йӱшаш вӱдым ситараш тӱҥалыт.
У Торъял посёлкысо 1-ше №-ан водозаборышто вӱдым пушкыдемдыме станций 82 процентлан ямде. Тиде объект 27,5 миллион наре теҥгеш шуэш.
«Морко районышто Чодраялыште да Арын селаште вӱдым ситарымаш» проектат мучашке лишемеш. Технический велым тудо 93,6 процентлан ямде. Пашалан чумыржо 23 миллион теҥгем кучылташ палемдыме.
Марий Элым вуйлатыше «Яндар вӱд» проектым илышыш пуртымо кышкарыште шукталтше чыла пашам шкеак эскера, молан манаш гын нуно вӱдым ситарыме системым уэмдаш, пытен шушо сетьлам вашталташ, калыклан сай качестван йӱшаш вӱдым налаш, коммуникацийлаште аварийым иземдаш йӧным ыштат.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
