У Торъял район моктанен кертеш!

У Торъял район моктанен кертеш!
01.08.2017
Республикысе райрӱдыла гыч Йошкар-Олашке ма, моло вере каяш тарваныме годым еҥ-влак моткочак кугу йӧндымылыкыш логалыт, вет кызыт чыла вере гаяк автовокзал-влак кугу кӧгӧн дене петырыме шинчат. Тиде амал дене пассажир-влак шуко вереже йӱштӧ игечыште кылмен, йӱран игечыште нӧрен, кече пелтыме годым «кӱын» шогеныт да шогат. Южо вереже, воктен улшо иктаж кевытыш пурен, чыла тидын деч шылаш тыршат.
 
У Торъял поселкыштат але марте еҥ-влак, автобусым вучен, игечын койышыж деч шылаш тыршен, жапыштым изи будко-вагон гайыште веле эртареныт. А ынде ты районышто илыше калык ласкан да ку-уштылгынак шӱлалтен, вет  райрӱдыштӧ кугарнян у автостанцийым почыч. Тушко республик вуйлатышын пашажым шуктышо Александр Евстифеев миен ыле.
 
Автостанций кугыжаныш-частный партнерство йӧн дене илышыш пурталтын. Тиде пашам верысе предприниматель Василий Лазарев шуктен. Тудо икмыняр автобус маршрутым «куча» - микроавтобусшо-влак Йошкар-Олашке, У Торъял поселко гыч районысо яллашке да южо райрӱдылашке коштыт.
 
Чоҥен шуктымешке да пашашке колтымешке, тудлан шагал огыл нелылыкым сеҥен лекташ, пӱжвӱдым ятыр йоктарашыже логалын, очыни. Санденак, Александр Евстифеев дене пырля йошкар тасмам пӱчмеке, погынышо калык ончылно ойлымыж годым эсогыл кумылжо тодылто. Республикыште тыгай йӧн дене почмо тиде – икымше автостанций. А икымшылан эреат нелырак.
 
Автостанций ден воктен кумдыкышто паша эше тӱрысшак мучашлалтын огыл гынат, тӱҥжӧ – тудо пашам ышташ тӱҥалын. Кок пачашан у автостанций тӱжвачынак шинчаш перна. А кӧргышкыжӧ пурет гын, эшеат ӧрат. Тыгай мемнан республикыште але марте нигуштат уке. Мо дене тугай чапле? Кӧргыштыжӧ, кокымшо пачашыште, водитель-влаклан каналташышт келыштарыме пӧлемыште, эсогыл душевой кабин уло! Тыгайым кушто ужында?! Икымше пачашышке пурен шогалмекак, тудын йоҥгыдылыкшо куандара. А эше – кондиционер улмо. Шокшо игечыште тудын кӱлешлыкшым поснак чот шижат. Теве автостанцийым почмо кечынак тушеч изишак «кылмен лекташ» могай сай ыле! Кажне пассажирым омса ваштарешак верланыше буфет «вашлиеш». Шола велне – кассе. Пурла велне - водитель-влакым рейсыш колтымо деч ончыч тергыме пӧлем. Икымше пачашыштак микроавтобус-влакым шогалташ кумда бокс, шинчаш вер-влак улыт. Кокымшо пачашыште утларак верже эше яра. Но ончыкыжым туштат мо-гынат лиеш. Чыла тидым республик ден район вуйлатыше, уна-влак веле огыл, погынышо еҥ-влакат ончен лектыч. Мо оҥайже, Александр Евстифеев калык деч торлен огыл, а нунын коклаштак ласкан кошто. Воктенже молгунамсе семынак нимогай оролат уке ыле.
 
Кок пачашыже мучкат коштын савырнымеке, регион вуйлатышын пашажым шуктышо палемдыш:
 
- Тиде автостанцийым почмаш - районлан веле огыл, пӱтынь республиклан моткоч кугу событий. Вет автовокзал дене кылдалтше йодыш  кызыт поснак пӱсӧ. Но район кӱкшытыштат тудым рашемдаш лиймым ме ужына. Августышто Марий Элыште инвестиций паша шотышто Йошкар-Олаште кугу совещаний лиеш. Тушто кугыжаныш-частный партнертство йодыш нергенат мутланаш тӱҥалына.
 
Ончыкыжым тыгай автостанций-влак почылтмым ынде моло районлаште илыше-влакат чытен-чытыде вучаш тӱҥалыт, очыни. А нуныжо содыки почылтытак манын ӱшаныме шуэш. 
 
Кечывалым, 12 шагатлан, Александр Евстифеев У Торъял поселкысо тӱвыра да каныме рӱдерыште калык дене вашлие. Тӱвыра полатыш тунар шукын погыненыт ыле – чылаштланак шинчашат вер ыш сите. Тиде мо нерген ойла: еҥ-влак тудлан, тургыжландарыше йодышыштым рашемден кертмыжлан да полшымыжлан чот ӱшанат.
 
А калыкым тӱрлӧ йодыш тургыжландара. Икымшыже, мутлан, поселкышто эше 2011 ийыштак чоҥаш тӱҥалме ФОК дене кылдалтын ыле. Поселкыш пурымаште, пурла велне, тудо пеш сӧралын койын шинча, но тушто «мардеж шӱшкымӧ» кумылым волта.
 
Тиде да моло йодыш, нунылан мом вашештыме, кузе рашемдаш палемдыме нерген шуматкече номерыште радамлынрак каласкалена.
 
Марий Эл Республик Вуйлатышын мер кыл ден увер виктемже
Кусарымаш - Л.Камалетдинова (газет "Марий Эл")