У Торъял кундем: Калыклан

Марий Элым вуйлатыше Юрий Зайцев У Торъял районысо икмыняр социальный объектыште лийын.

Паша вашлиймаш верысе Физкультур-тазалыкым пеҥгыдемдыме комплекс гыч тӱҥалын. Кызытлан тудо 92 процентлан ямде гынат, чоҥымо-монтаж паша график деч почеш кодын ышталтеш, тыгак эше икмыняр ситыдымаш уло. Регионым вуйлатышын палемдымыж почеш, подрядчиклан куштылго огыл, вет тудо чоҥымо пашам тӱҥалтыш гыч огеш ыште, сандене шуко мом тӧрлаташ да вашталташ логалеш. «Комплекс мылам келшыш. Кӱлешан объект. Профессионально ыштыме сай бассейн. Коеш, объектым сдатлаш палемдыме сроклан чылажат ямде. Александр Анатольевичлан комплексым 100 процент марте ямде улмыж марте пашам шке контрольышкыжо налаш йодам», – каласен тудо республик правительстве председательын алмаштышыже Александр Сальниковлан.

Ты кечынак Юрий Зайцев У Торъял школ-интеранатыште лийын, тушто шукерте огыл гына капитально олмыктымо пашам мучашлыме: леведышым, пырдыжым, сантехнике оборудованийым уэмдыме, тыгак класслаш да каныме кумдыклаш у оборудованийым налме. «Школым уэмден олмыктымо сомылым сайын ыштыме. Но йоча-влак ваштареш верланыше тӱшкагудышто илат, тусо пищеблокым 1956 ий гыч олмыктымо огыл, сандене тудым шотыш кондаш кӱлеш», – каласен регионым вуйлатыше.

Районышто автомашина кудалыштме корнын 4 участкыштыже (чумыр налмаште тиде – 46,6 километр) олмыктымо паша шотышто подрядный организацийын еҥже каласкален. Юрий Зайцев У Торъял ден Шернур кундемла кокласе корно шотышто йодын, молан манаш гын ты кумдык дене кылдалтше йодышым тений февральыште калык дене вашлиймаш годым еҥ-влак тарватеныт. «Корным нормтивлан келшыше марте шотыш кондымо. Объект 85 процентлан ямде. Сентябрьыште чыла пашам мучашлена, разметкым ыштена», – ӱшандарен Марий Эл транспорт да корно озанлык министр Александр Герасименко.

Тушнур ялыште лиймыж годым республикым вуйлатыше «Первый май» ялозанлык артельыште вольык комплексым чоҥымо площадкыште лийын да тушто ышталтше пашам сай могырым аклен. 2021 ийыште предприятий тыгаяк инвестиций проектым Чӱксола ялыште илышыш пуртен.

Ты кечын Юрий Зайцев верысе эше ик объектыште – индивидуальный предприниматель Андрей Куклинын Ретротехнике тоштерыштыже – лийын. Тушто кызыт 160 утла единице тыгай технике уло. «Мом мый ужынам – тыглай коллекций гына огыл, а тыште – элнан историйже да автомобильым ыштен лукмо паша. Мыйын шонымаште, тудым чылан ужшаш улыт», – палемден регионым вуйлатыше.

Объектлаште лиймыж деч вара тудо верысе администрацийыште совещанийым эртарен, тушто районын социальный-экономике могырым вияҥмыже да ончыкыжым ыштышаш паша дене кылдалтше йодышлам каҥашеныт.


Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен