У технологийым кучылташ, илышыш шыҥдараш…

Марий Эл вуйлатыше Юрий Зайцев тӱнямбал кӱкшытан «Армия-2023» военно-технический форумым торжественно почмаште лийын. Регионласе предприятий-шамычын стендыштым ончен, промышленностьым вияҥдымын ончыкылыкшым каҥашен.

Форумын участникше-шамычлан РФ президент Владимир Путин шке видеообращенийжым колтен.

Тудын палемдымыж почеш, эртыше ийлаште форум тӱнямбал кӱкшытыштӧ у да тачысе саманлан келшен толшо военный кӱлешлыкан продукцийже дене ойыртемалтын, военно-технический вияҥме шотышто пеҥгыде кылым ыштен.

– Стендлаште, экспозицийлаште, «Патриот» паркын полигонлаштыже элнан тӱжемат пеле предприятийже 28,5 тӱжем утла военный да тыныслык кӱлешлыкан у продукцийым ончыктен. Россий шке национальный интересшылан кугу тӱткышым ойырышо да иктӧр лӱдыкшыдымылык системым чоҥаш ямде улшо моло эл дене икгай праван технологий партнерствылан да военно-технический кылым кучаш омсажым почын, – ойлен В.Путин.

Ю.Зайцев СМИ-н еҥже-шамычлан республиклан сай ончыкылыкым пуышо корно, тудын форумышто участвоватлымыже вияҥаш полшымо нерген каласкален.

– Президент Владимир Путинын ойлымыж почеш, тачысе кечын вооруженийым вияҥдымаште кӱкшӧ технологийлан – цифровизацийлан, кибермероприятийлан, робототехникылан – тӱткышым ойырыман. Нунышт вооруженийым веле огыл, моло производствым вияҥашат кӱлыт, – манын регион вуйлатыше.

Тудын палемдымыж почеш, выставкыште республик гыч Марий машиностроительный завод, «Ната-ИНФО» ден Санта-М» предприятий-влак шке продукцийышт дене палдарат. Нуно у технологийым шымлат, шыҥдарат да продукцийышт дене рынкыш лектыт.

– Мый нине предприятийлашке миенам, подукцийышт дене палыме лийынам. Мо куандара, выставкын унаже-шамыч мемнан предприятий-влакын продукцийыштлан кугу тӱткышым ойырат, – манын Юрий Зайцев.


Марий Эл Республикым вуйлатышын администрацийжын информаций паша пӧлкажын уверже негызеш Е.Эшкинина ямдылен