У проспект вашке почылтеш

У проспект вашке почылтеш
15.10.2014
Марий Элым вуйлатыше Л.Маркелов Йошкар-Оласе Воскресенский проспектыште у корным ыштыме пашам терген. Тудын кокымшо черетшым Республикын кечыжлан почаш палемдыме.
 
У корным пашаш колтымылан кӧра тыште, шуко кудалыштме верыште,  автомашина-влаклан эрташ ятырлан куштылгырак лиеш. 700  метрыш шуйнышо участкын негызышкыже бетоным оптымо, ӱмбакше жап - лан келшыше асфальт-бетоным шарыме. Кудалыштме лӱдыкшыдымылык шотышто чыла стандартлан келшен толеш. Тыште автомашинам шогалташ «кӱсен-влак», общественный транспортлан калыкым шындаш-волташ кум остановко, йолешкылан вончаш келыштарыме тынарак вер ышталтыныт. Нуным лӱмын таптен лукмо кӱртньӧ авыртыш дене авырыме, корно сайын волгалтаралтеш.
 
- Ме тидым ик тӱҥ объектлан шотлена, молан манаш гын у технологий почеш йӧршеш у корным ыш тена, тудо кеч-могай нелытан транспортымат чыта. Негызышкыже тыгыде кӱм огыл, а бетоным оптымо. Ончыкыжо ты технологий почеш Ураев бульварым, Киров уремын ум бакыже шуйнышо ужашыжым, тыгак Петров уремым да Водопроводный уремын ужашыжым ышташ палемдалтын, - каласен Л.Маркелов.
 
Вара палемден: корным ыштыше пашаеҥ-влак писын да чапле качестве дене ыштен моштат. «30-40 ий ончыч корным тыге ыштат гын, ме тачысе гай нелылыкыш огына логал ыле. Тошто корно автомашинан, грузым шупшыктымын  ешаралтмыштым чытен огеш сеҥе. Корным ыштыме озанлыкыште нелылык уке огыл, но ме тудым решатлена, тыгай качестван корно рӱдолан ончыкылыкшо манын шонем», - палемден республикым вуйлатыше.
 
Кызыт строитель-влак пашам мучашлат. Корно знак-влакым шындыме да корно гыч эҥерыш йогышо йӱр вӱдым эрыктыше станцийыште пашам таче-эрла пытарат. Кодшо кечылаште ныл светофорым шогалтыме. «Сигнал» ЦОД МБУ субподряд организацийын тӱҥ инженерже К.Сапан мутшо почеш, пашазе-влак Воскресенский проспект ден Водопроводный урем ушнымаште корнеш разметкым ыштат.  
 
Марий Эл Республик Вуйлатышын мер кыл ден увер виктемже
Кусарымаш - А.Андреев (газет "Марий Эл")