У паша дене саламлен

У паша дене саламлен
08.10.2014
Марий Элым вуйлатыше Л.Маркелов «Йошкар-Ола» ола округын кызыт сайлалтше вуйлатышыже, оласе депутат-влак погынымашын председательже А.Принцев дене вашлийын.
 
Л.Маркелов эн ончычак тудым у должностьыш шогалме дене саламлен.
 
Тендан ончылно пеш кӱлешан задаче шога – калык дене ваш умылымашым муаш, тудын шонен-илымыжым палаш, ӱшанжым сулаш. Сайлыше-шамыч деч пурышо наказ ден йодыш-влакым шуктен шогаш тӱҥалыда да тидыже рӱдоланан вияҥмаштыже сай вашталтышым ышташ полша манын ӱшаныме шуэш, палемден тудо.
 
Республикым вуйлатыше олан бюджет политикыжым сайын шонен виктараш, парышым налме пашам вияҥдаш темлен. «Таче ме Йошкар-Олаште пеш кугу медицине, тӱвыра, спорт объект-влакым чоҥена. Тылеч посна корнымат ыштена. Тыгак рӱдоласе кудывечым, уремым тӱзаташ кӱлеш. Вашке теле шуэш, жапыштыже лумым кораҥдаш пижман. Паша пеш шуко. Олан илышыжым саемдышаш верч пашам кыртмен ышташ темлем. Калык лектышым ужшаш”,  – палемден Л.Маркелов.
 
Вашлиймаште нуно эн ончыч шуктышаш задаче-влак нерген мутланеныт. А.Принцев 15 ий наре Республиканский йоча клинический эмлымверыште тӱҥ врачлан ыштен. «Политикат, медицине пашаеҥат илышыштын утларак ужашыжым калык дене пашам ыштен, мутланен эртарат. Икымшышт – тудын дене вашлиймаште, весышт – черлым эмлыме годым. Мый тыге шотлем: кӧ политикыш кугу илыш опыт дене толын гын, сайлышыже-влаклан утларак кугу пайдам конден кертеш. А тушко вучыдымын, йоҥылыш логалше-влак шуко сӧрат, а шуктенже огыт керт», - манын Александр Принцев.
 
Марий Эл Республик Вуйлатышын мер кыл ден увер виктемже
Кусарымаш - Л.Иванова (газет "Марий Эл")