У микрорайон-влакым чоҥыман, туризмым вияҥдыман

Марий Эл вуйлатыше Юрий Зайцев Росреестрын республикысе управленийжын вуйлатышыже Аркадий Белкин дене вашлийын.

Нуно ведомствын тений пел ий жапыште шуктымо пашажым каҥашеныт. Посна тӱткыш пуымо услугым электрон йӧныш кусарыме, туризмым вияҥдаш, чоҥымо пашам шукташ келшен толшо мланде участкым рашемдыме йодыш-влаклан ойыралтын.

Управлений вуйлатышын ойлымыж почеш, тачысе кечылан пуымо услуго гыч пелыжым электрон йӧныш кусарыме.

– Застройщик-шамыч денат кызыт ойпидышым тыгай йӧн денак ыштена. Ипотеке шотыштат тыгак. Йодмаш электрон йӧн дене пура гын, регистарций 24 шагат жапыште ышталтеш, – палдарен Аркадий Белкин.

Марий Эл вуйлатышын палемдымыж почеш, республикын правительствыж ден регионысо управленийын пырля шуктымо пашаштын тӱҥ направленийышт – «Чоҥаш мланде» ден «Туризмлан мланде» проект-влакым илышыш пуртымаш. Юрий Зайцевын ойлымыж почеш, нине проект-влак илыме у микрорайон-шамычым чоҥаш, еҥ-влаклан келшыше условийым ышташ, кундемышкына турист-шамычым толаш кумылаҥдаш, инфраструктурым да экономикым вияҥдаш полшат.

Аркадий Белкинын ойлымыж почеш, Марий Элыште инвестор-влаклан у туристический кумдыкым вияҥдаш келшыше кок мланде участке уло. Иктыже Юрино поселкышто, весыже Козьмодемьянск олаште верланеныт.

 

Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен