У кӱкшытыш лектыт

У кӱкшытыш лектыт
23.07.2014
​Марий Эл Республикым вуйлатыше Л.Маркелов «Водоканал» МУП-ын пашаче коллективше дене вашлийын, рӱдолалан сай качестван йӱшаш вӱдым ситарыме йодышым каҥашен.
 
Водоканал - Йошкар-Олан коммунальный озанлыкшын ик эн тошто предприятийже. Тудо 1937 ийыште ышталтын да тунам «Горводопровод» маналтын. Кызыт предприятий Йошкар-Олаште илыше 240 тӱжем еҥлан да ола лишне улшо кок поселкылан йӱшаш вӱдым ситара. Тыгак 2085 предприятий ден организацийышке тудым колтен шога.
 
«Водоканал» МУП - сайын пашам ыштыше оласе предприятий-влак кокла гыч иктыже. Туге гынат тудын пашаштыжат йодыш-влак лектынак шогат. Нуным правительствын полшымыж деч посна решатлаш огеш лий.
 
Рӱдӧ диспетчер службын пашаж дене палыме лиймыж годым Л.Маркелов иктыжым шкежат ужо. Вӱдым пуымым электрон йӧн дене эскерыше системе жаплан келшыше огыл. Тудо аварий лиймым жапыштыже шижтарен огеш  шукто. Аварий лийме нерген уверым жапыштыже налаш да тудым писын кораҥдаш манын, Л.Маркелов олам да предприятийым вуйлатыше-влаклан ты системыш у программым шыҥдараш кӱштен.
 
Предприятий директор В.Рыбаков республик вуйлатышылан йӱшаш вӱдын качествыжым да вӱд пуч корным саемдаш кӱлмӧ нерген ойлен. Нуным илышыш шыҥдарышашлан республик вуйлатыше ола администраций ден водоканалын 2015-2020 ийлан целевой программым ышташ темлымышт дене келшен. Тудым илышыш шыҥдараш 400 миллион теҥге кӱлеш. Мыняржым республикын бюджетше гыч ойыраш сӧрен.
 
- Предприятийда икшырымын вияҥеш. Тидымак 21 тӱжем теҥге кокла пашадарда пеҥгыдемда. Но водоканаллан у технологий кӱкшытыш кусныман. Тидым кызытсе экологий нормо, потребитель-влак да научно-технический прогресс йодыт. XXI курымын кокымшо пелыштыже лач вӱд тӱҥ поянлык да энергийым налме йӧн лиеш, - манын республикым вуйлатыше.
 
Муниципальный предприятийыште пашам ыштыше-влакын йодмышт почеш Л.Маркелов правительствын экономический да социальный политикыжын тӱҥ корныж дене палдарен, йодышыштлан вашештен.
 
Марий Эл Республик Вуйлатышын мер кыл ден увер виктемже
Кусарымаш - Е.Садовин (газет "Марий Эл")