«У илышыш корно» почылтын

«У илышыш корно» почылтын
19.09.2017
 
Александр Евстифеев кодшо арнян Параньга районыш миен.
 
Тушто эн ончычак Олор ден Сидыр почиҥга ял-влак коклаште ыштыме да август мучаште пашашке колтымо корно ужашым ончен савырнен. Объект  «2014-2017 ийлан да 2020 ий марте жаплан ял кундемым вияҥдымаш» федеральный целевой программе почеш чоҥалтын. Кужытшо 1километрат 617 метр. Пашан тӱрыс акше 31 775,486 теҥгешке шуын. Тышеч 20 428,460 теҥгеже федеральный бюджет гыч ойыралтын. Олорышто у уремыште тыгак тротуарым ыштеныт да кумдыкым волгалтареныт.
 
- Коеш: чылажымат сай качестве да шот дене ыштыме. Чоҥымо пашам шошым тӱҥалыныт да шыже йӱр марте пытареныт. Подрядчик дек нимогай ӧпке уке, - каласен Александр Евстифеев.
 
Усола ял шотан илем администраций вуйлатыше Юрий Сидоровын республик вуйлатышын пашажым шуктышылан палдарымыж почеш, тыште илыше-влаклан тиде ынде у илышыш корно лийын.  
 
- Корно лиеш манын, калык пытартыш марте ӱшанен огыл. Ончыч «Вашкеполыш» машинашке еҥ-влакым урем мучко носилка але издер дене луктыныт. А кунам  90 кече гыч лопка корно ышталтын, шукыштын шинчавӱдышт лектын. Кужу жап чоҥыде шинчыше пӧртым ынде кӱчык жапыште леведыш йымаке пуртеныт, - палемден Ю.Сидоров.
 
«Марийскавтодор» ГКУ вуйлатыше Александр Сальников ты программе почеш паша республикыште умбакыжат шуйна да кушто мом ыштышаш палемдалтын манын палдарен.
 
- Шушаш ийын республикыште куд объектым чоҥена. Иктыже–  Параньга  районысо Марий Сеснур ялыште ик километр наре кужытан корно лиеш, - каласен А.Сальников.
 
Ты районышто эше кум ял деке сай корно уке. Программын планже дене келшышын, нуным кум ий жапыште ыштышаш улыт.
 
Олор-Сидыр почиҥга – тенийлан палемдыме куд корно гыч икымшыже. Тиде тылзын, сентябрьыште, Марий Турек да Советский районлаште сдатлышаш улыт. Октябрьыште Курыкмарий, Шернур да Волжский районлаште икмыняр вере еҥ-влак у корно дене ласкан эртен кертыт.
 
Тиде кечынак А.Евстифеев Параньга поселкысо школ пелен у стадионым почмаште лийын.
 
Тудо самырык спортсмен-влак дене мутланен да площадкым, молым кузе ыштымым терген.
 
 - Стадионым почмо спортым вияҥдаш, поселкышто илыше-влакым, поснак кушшо тукымым спортлан шӱмаҥдаш полшаш тӱҥалеш манын ӱшанем. Мемнан тунемше ден самырык еҥна-влак спортышто, эн ончычак Юл кундемысе федеральный округышто, ончыл верлаште улыт. Спортышто шумо сеҥымаш-влак дене республике - шымше верыште. Тидын дене ме кугешнена, - саламлымыж годым каласен А.Евстифеев.  
 
Школын спортзалже кужу жап йоча-влаклан физкультур дене заниматлаш, а туныктышо-влаклан урокым келшен толшын эртараш йӧнан лийын огыл. Тушто иканаште кум класс марте заниматлашышт логалын. У спорт площадкым ыштыме дене спортзалыштат тунемше-влаклан вер ситыше лиеш, тыгак ынде гимнастике, куштылго атлетике да кучедалмаш дене заниматлаш йӧн пуалтын.
 
Стадионым Марий Элын Спорт министерствыжын йодмашыж почеш  республиканский адресный инвестиционный программе дене келшышын ӱмаште чоҥаш тӱҥалыныт. Тудын акше 4850 тӱжем теҥгешке шуын. Тиде ты программе почеш тений почмо кудымшо  школ  стадион лийын. Тылеч ончыч спорт площадке-влакым Килемар, Кужэҥер, Морко, Оршанке да Марий Турек районлаште пашашке колтеныт. Ончыкыжым Курыкмарий, Звенигово, Медведево, У Торъял, Шернур, Советский,  Юрино районлаште да Козьмодемьянскыште ышташ палемдалтеш.
 
Тыгак А.Евстифеев Параньгаште пашам ыштымым чарныше автостанций воктенсе вокзал кумдыкышто лийын. Тушто район администраций вуйлатыше дене тиде да калыкым транспорт шотышто обслужитватлыме йодыш-влак нерген мутланеныт. Республик вуйлатышын пашажым шуктышо кугыжаныш-частный партнерство йӧн дене У Торъял поселкысо семын у автостанцийым чоҥымо йӧным кузе кучылташ лиймым шоналташ темлен. Тиддеч посна автобусым вучымо годым еҥ-влак кылмен, нӧрен ынышт шого манын, район администраций вуйлатышылан А.Евстифеев жаплан келыштарыме «вучымо залым» ышташ темлен.
 
 
Марий Эл Республик Вуйлатышын мер кыл ден увер виктемже
Кусарымаш - Л.Камалетдинова (газет "Марий Эл")