Марий Элым вуйлатыше Юрий Зайцев «Увер дене палдарыме кечым» эртарыме годым еҥ-влак деч ик эн тургыжландарыше йодышыштым погаш темлен.
Ты шотышто докладышт дене муниципальный образованийлам вуйлатыше-влак Наталья Арганякова (Курыкмарий) ден Александр Плотников (Оршанке) палдареныт. Нунын ойлымышт почеш, «Увер дене палдарыме кече» гай вашлиймаш-шамыч социальный могырым пӱсылыкым «тӧремдаш» полшат да кучем ден еҥ-влак коклаште пайдале вашмутланымашым шочыктат.
Юрий Зайцев палемден: тыгай кече-шамыч мунципальный образованийлам вуйлатыше-влаклан веле огыл, калыкланат кӱлешан. Санденак мероприятий деч вара пӱсӧ йодышым, еҥ-влакын йодмашыштым каҥашаш темлен.
«Тыгай вашлиймашыш калык шуко погына, тушто налме уверым правительстве еҥ-влаклан намиен шуктыман, молан манаш южо йодышым республик кучем кӱкшытыштӧ писынрак решатлаш лиеш», – каласен тудо.
Совещанийыште тыгак ял кумдыкым комплексно вияҥдыме дене кылдалтше, 2023 ийыште «Тӱвыра» национальный проектым илышыш пуртымо дене кылдалтше йодышлам каҥашеныт.
Регионым вуйлатышын палемдымыж почеш, Марий Элыштына у ийыште «кужу» каныш сайын эртен, сандене пайрем кечылаште ты шотышто пашам организоватлыше-шамычлан тауштен ойлен. Тыгак лишыл кечылаште Крешене пайремым эртарыме шотышто йӱштылмӧ верлаште лӱдыкшыдымыдылык шотышто йодышлан тӱткышым ойырен.
Тӱвыра, савыктыш да калык-влакын пашашт шотышто министр Константин Иванов 2022 ийыште «Тӱвыра» национальный проектым илышыш пуртымо шотышто пашам иктешлен да тений ыштышаш нерген ойлен. Тудо Юрий Зайцевым Я.Эшпай лӱмеш Козьмодемьянскысе искусство школлан да У Торъял район Чӱксола тӱвыра пӧртлан республикын бюджетше гыч 8,3 миллион теҥгем ойырымыжлан тауштен.
Марий Элым вуйлатыше палемден: у идалыкым чулымын тӱҥалман, паша ончычсо семынак тыршен ыштыман.
Марий Эл вуйлатышын администрацийжын информаций паша пӧлкажын уверже негызеш Г.Кожевникова ямдылен
