|
У фельдшер-акушер пункт лиеш
20.06.2014
Марий Элым вуйлатыше Л.Маркелов Медведево район Кыдал Озакъялыште ончыкылык у фельдшер-акушер пунктын зданийжын негызышкыже шарнымашан кӱм пыштымаште лийын.
Оралте, Марий Элын «Здравоохраненийым вияҥдымаш» кугыжаныш программыж дене келшышын, 2014 ийыште фельдшер-акушер пункт-шамычын ик сетьыштым комплексно вияҥдыме шот дене чоҥалтеш. Чумыр кумдыкшо 230 квадрат метр лиеш, акше 10 миллионат 161,2 тӱжем теҥгеш шуэш. Тудым нӧлташ окса, Марий Эл правительствын 2014 ий 23 январьысе пунчалже дене келшышын, республикын бюджетше гыч тенийлан палемдыме адресный инвестиций программе почеш ойыралтеш.
- Ме республикыште илыше-влаклан чаплын пойдарыме медицине учрежденийым илыме вер пеленыштак ышташ тыршена, - манын республикым вуйлатыше. – Тидын шотышто кумда программе шукталтеш. Власть ончылно шогышо задаче – кушто еҥ-шамычлан кӱлеш, тушан ФАП-влакым чоҥаш. Ялыште медицине уке гын, «илышын качествыже» нерген шомакымат лукман огыл.
Кыдал Озакъялыште фельдшер-акушер пункт ты кундемыште верланыше куд ялыште илыше 1,5 тӱжем еҥлан медицине полышым пуаш тӱҥалеш. Тудо сменыште 30 еҥым колтен кертеш. Заказчик – Марий Элын Здравоохранений министерствыже. Аукцион почеш чоҥышашлан кугыжаныш контрактым «Марспецмонтаж» ОАО дене ыштыме.
ФАП-ын зданийжым лишыл жапыште – тений августышто – чоҥен шукташ палемдалтеш. Здравоохранений министерстве вуйлатыше-шамычын мутышт почеш, кызыт элыште 100 квадрат метр кумдыкан модульный ФАП-влак нерген ойлат, но Марий Элыште яллаште медицине полышым пуышо учреждений-влак кок пачаш шуко чоҥалтыт. Тушто приемым фельдшерат, акушерат кугыеҥ ден йоча-влаклан эртараш тӱҥалыт. Чоҥалтше ФАП чыла шотыштат пойдарыме лиеш.
- Ме, медицине пашаеҥ-влак, еҥ-влаклан полышым пуаш жаплан келшыше ФАП лиймылан моткочак куаненна. Пашам чаплын ышташ ме уло вийым пышташ тӱҥалына. Мемнан кундемыште лийше вашталтышлан куанена. У фельдшер-акушер пункт пашанам палынак куштылемда, - каласен кызыт ыштыше ФАП-ын фельдшерже О.Иванова.
Марий Эл Республик Вуйлатышын мер кыл ден увер виктемже
Кусарымаш - А.Андреев (газет "Марий Эл") |
У фельдшер-акушер пункт лиеш
