У факультетын студентше-влак дене вашлийын Марий Эл Республик вуйлатыше Л.Маркелов МарГУ-н медицине да естественный науко институтшын студентше-влак дене вашлийын

У факультетын студентше-влак дене вашлийын Марий Эл Республик вуйлатыше Л.Маркелов МарГУ-н медицине да естественный науко институтшын студентше-влак дене вашлийын
02.09.2014
Леонид Игоревич республикыште кӱшыл образованийын вияҥмыж нерген, Изи Какшан сер воктене медицине факультетын ешартыш корпусшым чоҥымо нерген ойлен. Воктенжак амбулаторий да поликлинике корпусым нӧлтат, тушто студент-шамыч практикым эрташ да опытым погаш тӱҥалыт.
 
Республик вуйлатыше регионласе вуз-влак коклаште улшо конкуренций нерген палемден, Марий Элыште медицине дене кылдалтше кӱшыл тунемме заведений огеш лий гын, медицине отрасльыште пашаеҥ кӱлмӧ проблеме эре пӱсӧ лиеш манын каласен.
 
- Марий Элыште медицине кум корно дене вияҥшаш. Материально-технический базым уэмдыман, врач, медицине пашаеҥ-влакын профессионал командыштым ыштыман, черле-шамычлан сай качестван полышым пуыман. Лач тунам еҥ-влак вес кундемыш эмлалташ кошташ огыт тӱҥал, - каласен Л.Маркелов.
 
Тылеч посна  университетыште у йӱла шочын. Марий Эл вуйлатыше медицине да естественный науко институтын икымше курсыштыжо тунемше-влаклан ош халат-шамычым кучыктен. Вуйлатышын кидше гыч К.Подорожнюк ден А.Цыганов-лан  врач-влакын вургемыштым налаш пиал шыргыжалын. Ты кок студент тунемаш пурымо годым экзаменыште эн сай шинчымашым ончыктен.
 
Чылаже медфакультетыш 90 еҥым налме: 30 – бюджет верыш, 30 – тӱлен тунемме группыш, 30 – йот эл гыч. Тыште Таджикистан, Украина, Африка гыч ӱдыр-рвезе-шамыч тунемаш тӱҥалыт.
 
- Чылаже ты факультетыш 400 утла йодмаш пурен, но тунемаш эн келге шинчымашан-влак пуреныт. Марий Эл Республикын правительствыже да вуйлатышыжлан кӧра гына республикыште медфакультет почылтын. Санденак ме чылаштын ӱшаныштым сулышаш улына, - каласен МарГУ-н ректоржо М.Швецов.
 
Медицине да естественный науко институтын студентше-влак биологий, химий, анатомий да моло профессионал дисциплиным келгын шымлат, тыгак йылме культурым, психологийым, медицинын историйжым, йот йылмым тунемаш тӱҥалыт.
 
Марий Эл Республик вуйлатыше университетын вияҥмыж шотышто  тыгай вашлиймашым кажне ийын эртараш манын палемден.
 
Марий Эл Республик Вуйлатышын мер кыл ден увер виктемже
Кусарымаш - Л.Шабдарова (газет "Марий Эл")