У асфальт завод пашаш шогалын

У асфальт завод пашаш шогалын
03.07.2014
Йошкар-Олаште асфальтым лукшо у заводым пашаш колтымо. Тудым почмаште республикым вуйлатыше Л.Маркелов ден рӱдола администраций вуйлатышын пашажым жаплан шуктышо  П.Плотников лийыныт.
 
Марий Элым вуйлатыше у асфальт-бетон установкым официально пашаш колтымым эскерен. У заводым чоҥаш рӱдолан бюджетше гыч 20 миллион утла теҥге ойыралтын, тышеч 18 миллионжо - установкын акше. Тудын сай ойыртемже – чыла пашам компьютер виктара.
 
- Ӧраш веле кодеш: рӱдола администрацийым вуйлатыше мынярын лийыныт гын, нылле ий жапыште Йошкар-Олалан асфальтым лукташ иктат установкым налаш кӱлешлан шотлен огыл. Таче тиде ышталтын. Тиде пеш волгыдо пример, олаште корно чапле лийже манын, ме чылажымат ышташ тыршена, - каласен республикым вуйлатыше Леонид Маркелов.
 
Йошкар тасмам пӱчмеке, Л.Маркелов у производствым Йошкар-Олан корно отрасльышкыже кугу инвестиций семын аклен. Тыгак палемден: установко экологийлан эҥгекым огеш ыште гаяк, молан манаш гын тудо мазут дене огыл, а пӱртӱс газ дене ышта.
 
Икымше тонн у асфальт вашке Йошкар-Оласе корнылаш возеш. Ончыкыжо 1971 ийыште лукмо кок установкым уэмдаш палемдалтеш. Кызыт нунышт шагатыште улыжат 40 тонн асфальт вартышым ыштен сеҥат. А у установко ты жапыштак 64 тонным ямдыла. Мут толмашеш, ик квадрат метр корным олмыктышашлан кокла шот дене 120 килограмм асфальт кӱлеш.
 
Тачысе кечылан «Ола» МУП-ын 150 наре тӱрлӧ техникыже уло, тышеч кумшо ужашыже жаплан келшыше машина дене алмашталтын. Пытартыш кум ийыште техникым уэмдаш 100   миллион утла теҥгем кучылтмо. Мутлан, уремым ӱштшӧ да лумым кораҥдыше механизмлам, Швецийыште лукмо «Бродвей» кок техникым, корным ыштыше да моло автотранспортым налме.
 
П.Плотниковын мутшо почеш, «Ола» МУП-ын материально-технический базыже ончыкыжат пойдаралташ тӱҥалеш.
 
- Кызыт 2015 ийлан бюджетын проектшым ыштена, тушто уремысе корно сетьым кучаш 200 миллион теҥгем ойыраш палемдалтын. Тений 126 миллион, а ончылий улыжат 80 миллион теҥге ойыралтын ыле. Ончык сай ошкыл коеш. Тылеч посна 50 миллион теҥгем жаплан келшыше у технологический оборудованийым да корным ыштышаш техникым налаш ойырена, - палемден П.Плотников. – Таче олаште илыше-шамыч рӱдолан шуко уремыштыже корным олмыктымо пашам тӱшкан ыштымым ужын кертыт.
 
Марий Эл Республик Вуйлатышын мер кыл ден увер виктемже
Кусарымаш - Д. Речкин (газет "Марий Эл")