Тыршат, полышым пуат

Марий Эл вуйлатыше суд пристав-влакым профессионал пайремышт дене саламлен.

Суд приставын кечыжлан пӧлеклалтше торжественный мероприятий Суд пристав-влакын федеральный службыштын Марий Элысе управленийыштыже эртен.

– Тений лу тылзе жапыште республикысе суд пристав-влакын исполнительный производствышт дене 2 миллиардат 114 миллион утла теҥге чумырген. Тышеч тӱрлӧ кӱкшытан бюджетыш 600 миллион утла теҥге да 128 миллион наре теҥге алиментым тӱлаш колталтын.

Управленийын пашаеҥже-влак СВО-што улшо-влаклан, тыгак Российын у кундемлаштыже илыше-шамычлан гуманитар полышым ик гана веле огыл колтеныт. Нуно шуко шочшан еш-влаклан вургемым, моло кӱлешым чумыреныт. Тыгак землякна-влаклан – морской пехотинец-шамычлан управленийын чыла пашаеҥжын ойырымо оксаж дене налме автомобильым колтеныт, – палемден Юрий Зайцев.

Управлений йоча пӧрт-влаклан эреак полша. Пашаеҥ-влак кажне ийын 1 сентябрь вашеш икшыве-влакым школыш чумыраш полшат, тӱрлӧ мероприятийым эртарат. Тыгак суд пристав-влак патриотический да спорт акцийлашке эреак ушнат.

Республик вуйлатыше нунын тыршен пашам ыштымыштлан тауштен да награде-влакым кучыктен.

Суд пристав-влакын федеральный службыштын Марий Элысе управленийыштыже кызыт 374 еҥ тырша. Тачысе кечылан нуно 472 тӱжем утла исполнительный производствым мучашленыт.


Марий Эл Вуйлатышын администрацийжын информаций паша пӧлкажын уверже негызеш Л.Камалетдинова ямдылен