Туныктат, полышым пуат

Марий Эл вуйлатыше Юрий Зайцев Тӱвыра инициативе-влак президент фондын директоржо Роман Карманов дене келшен пашам ыштыме шотышто ойпидышеш кидпалыжым пыштен.

Фонд вуйлатыше дене пырля Ю.Зайцев Калык тӱвыра пӧртыштӧ Креативно-туныктымо рӱдер ден проектный офисым почыныт.

Тений январьыште  Марий Эл Правительствын  кӱштымашыж почеш ты пӧртым капитально олмыкташ  29 миллион теҥгем ойыреныт.  Чылаже ты пашалан 24,4 миллион теҥгем кучылтмо. Ончыкыжым 2,2 миллион теҥгелан офисный мебельым налаш шонат. Тыге кабинетла ден коридорлаште, йӱкым возымо студийыште, гардеробышто кӱварым капитально олмыктеныт, электромонтажный пашам  эртареныт, омсалондемлам, шонданым ачаленыт, оралте ончылно корным, машинам шогалтыме верым асфальтироватленыт.

Кокымшо пачашыште служебный пӧлем-шамыч, любительский коллектив-влакын вуйлатышыштын кабинетышт, кок куштымо зал улыт. Кумшо пачашыште  тӱвыра ден мер ушем-шамыч  лийыт.

А рӱдерым почмо кечын конференц-залыште Запорожье областьысе Куйбышев районжо гыч  тӱвыра пашаеҥ-влакын семинарышт эртен. Марий Эл вуйлатыше нунылан пашаштышт тӱвыргӧ лектышым тыланен. Семинарыш погынышо-влак Ю.Зайцевлан тауштеныт да семинарыш ушнаш ӱжыныт. 

Проект офис творческий проектлам илышыш шыҥдараш полшышо грантым налаш шонышо муниципал тӱвыра учреждений-влакын еҥышт, НКО, индивидуальный предприниматель-влак, коммерческий организацийла дене пашам ышташ тӱҥалеш. 

Ты офисын специалистше-шамыч туныктымо мероприятийым  эртарат, мониторингым, регионын грант конкурслашке ушнымо анализым ыштат, сеҥыше проект-влаклан увер полышым пуат.

Марий Эл Республикым вуйлатышын администрацийжын информаций паша пӧлкажын уверже негызеш Л.ШАБДАРОВА ямдылен