Тоштемше илыме вер гыч - уыш

Тоштемше илыме вер гыч - уыш
15.08.2017
Александр Евстифеев тоштемше пӧртла гыч еҥ-влакым илаш кусараш ямдылыме пӧртым ончен савырнен. Тудо Медведево поселкышто Чавайн урем, 17 адрес дене верланен.
 
Кум пачашан 22 пачеран пӧрт еш-влакым лишыл жапыште, 1 сентябрь марте, вашлиеш. Тунам тышке 8 еш илаш кусна. Тыге «2013-2017 ийлаште еҥ-влакым тоштемше пӧртла гыч кусарымаш» программе Медведево районышто тӱрыс шукталтеш. Тудын дене келшышын, ты кундемыште вич ий жапыште шуко пачеран 22 пӧртым пашаш колтеныт. Нунын коклаште 517 пачерыш еҥ-влакым тоштемше пӧртла гыч илаш кусареныт, шуко пачеран 110 тоштемше пӧртым пуженыт. Тиде программе почеш Марий Элыште чылаже 7 тӱжем утла еҥ у верыш илаш куснен.
 
Александр Александрович пӧртысӧ кок пачерым ончен лектын да нуным сайлан шотлен.
 
А.Евстифеев дене вашлиймышт годым ончыкылык пачер оза-влак илыме верым чоҥымылан тауштеныт. Нуно пӧртышт воктенак йочасад, школ, тораштак огыл черке, стадион, спорткомплекс улмым моткоч сай семын палемденыт.
 
- Программе келшен толшын вияҥеш. Кызыт 2012 ий 1 январь марте тоштемшылан шотлалтше пӧртла гыч еҥ-влакым кусарыме паша мучашлалтеш. Тиде Россий президентын майысе пунчалжым шуйымо нерген ойлалтеш. Республиклан 3,5 миллиард утла теҥге ойыралтын. 1 сентябрь марте мыланна 229 пачер гыч 610 еҥым  кусараш кодын, - каласен республик вуйлатышын пашажым шуктышо.  
 
Тидын дене программын пытартыш йыжыҥже мучашлалтеш гынат, весе лиеш, шонат Чоҥымо паша, архитектур, илыме вер да коммунальный озанлык министерствыште.
 
Марий Эл Республик Вуйлатышын мер кыл ден увер виктемже
Кусарымаш - Л.Камалетдинова (газет "Марий Эл")