Тора район ӧрдыжеш ок код

Тора район ӧрдыжеш ок код
19.07.2021

Юрино районым социальный да экономике могырым вияҥдыме паша кузе кайымым рашемдышашлан Марий Эл вуйлатыше Александр Евстифеев район администраций вуйлатыше Марина Шихова дене паша вашлиймашым эртарен.

Ик эн кӱлешан йодыш 40 километр кутышан Марьино – Юрино корным пужен ыштыме дене кылдалтын. Ты пашам вес ийыште мучашлышаш улыт. Кызытеш тушто 16 километрым капитально олмыктымо. Район рӱдыш пурымо Кочетов уремым тӧрлен шуктат. 1,5 километрым тӱрыс шотыш кондымо.

Эше шукерте огыл посёлко лукеш кодшо гай ыле. Но инвестор толын да Юлын пурла ден шола серлажым кылдаш шонен пыштен. Юрино велым паромым вашлияш тачак ямде улыт. Вес вел серыште, Сумка селаште, кызыт судно шогалме вер чоҥалтеш. «У транспорт кыл туризм да торговльо кӱшеш районым вияҥдаш йӧным почеш. Тидыже мыланна – кугу событий», – палемден район администраций вуйлатыше.

Кужу жап район рӱдыштӧ стадион лийын огыл. Тудым кодшо ийын чоҥаш тӱҥалме. Объектын акше 23 миллион теҥгеш шуэш. Тачысе кечылан стадионым  оборудоватлыме да пашаш колтымо. Еҥ-влаклан тудо пеш келшен.

Юрино посёлкышто кужу жап чоҥалтше 39 пачеран пӧрт нергенат йодыш лекде кертын огыл. Тудым эше 1995 ийыштак негызлыме. Ынде пӧртым муниципал собственностьыш кусарыме, пужен ышташ проектат ямде, инвестор дене кутырен келыштаралтеш.

Марий Эл вуйлатыше Юрино районын эше ик тӱҥ объектшым, Шереметев замкым, пужен ыштыме йодышым тарватен. Кодшо ийын тудым посёлкысо газ дене олтымо системыш ушымо, уке гын тымарте мландышӱй дене олтен ырыкталтын. Тылеч вара тусо условий палынак саемын. Замкым умбакыже пужен ыштыме дене кылдалтше йодмашым федерал рӱдерыш колтымо. 

Марий Эл Республикым вуйлатышын организаций да аналитике виктемжын уверже негызеш Ю.Исаков ямдылен