Козьмодемьянскысе «Паллада» парус клубышто 8 гыч 16 ияш марте шӱдӧ утла ӱдыр-рвезе шотлалтеш. Йоча-шамыч шкеак судным олмыктат, мӱндыр вӱд корныш лектыт. Тиде парус клубын еҥже-влак «Паллада» тунемме судно дене чара путешествийышкат лектыт.
Пел ий ончыч меценат-шамычын полышышт дене мастерскойым чоҥеныт. Тушто «Марий Элын йоча флотилийже» у проект илышыш шыҥдаралтеш. Тыге изи моряк-влак идалык мучко теҥыз пашалан тунемын кертыт.
Паша дене мийымыж годым Марий Эл вуйлатыше мастерскойыш пурен, парус клубын вуйлатышыже Андрей Желудкин да Козьмодемьянскысе юнго-влак дене мутланен.
А.Желудкин самырык моряк-шамычын сай результатыш шумышт нерген ойлен, вет клуб ик гана веле огыл президент грантым налын. Верысе моряк-влак тӱнямбал кӱкшытан «Артек», «Орлёнок» йоча рӱдерлаште эртыше теҥыз сборлаште участвоватлат.
– Самырык тукымлан келыштаралтше тыгай клуб Российыште иктат уке. Мый дечем проектым йодыныт, колтенам. Мемнан воспитанникна-влак сай школым эртеныт, сандене шукышт элнам аралат, служитлат, – палемден Андрей Желудкин.
– «Паллада» парус клубын результатше чынжымак ӧрыктара. Вуйлатышын кумылан йоча-влакым ушен моштымыжат пеш сай. Южышт ӱмырешлан теҥыз пашам йӧратен шындат да ончыкшым, тыгай профессийым ойырен, республикнам чапландарат. Йоча-шамычлан яндар кава тӱрым тыланем. Шонымашышкыда шуашак тыршыза. Ӱшанем, тендан чылажат сай лиеш, – манын Юрий Зайцев.
«Паллада» парус клуб 2011 ий гыч пашам ышта. Клуб вуйлатыше изи ола гыч тышке шукырак рвезым ушаш тырша, сандене занятийлашке Курык марий районысо ялла гычат самырык моряк-влак ушнат.
Великий Новгород ола гыч капитан Н.Варухинын Йоча теҥыз рӱдерже дене кылым кучышо «Паллада» парус клубын морякше-влак «Россий – 21 курымысо мореход-шамычын элышт» проектын участникше лийыныт. Адакшым нуно кажне ийын «Суднын операторжо» программе почеш ешартыш шинчымашым налыт.
2020 ийыште «Паллада» Марий Элыште эн сай военно-патриотический клуб семын палемдалтын.
Тыгак ты клуб, «Паруса Марий Эл» проект дене келшышын, «Море детям» всероссийский конкурсышто «Лучший яхтенный поход по внутренним водным путям» номинацийыште сеҥышыш (2019 ий) лектын. 2021 ийыште верысе юнго-шамычын командышт Великий Новгородышто самырык моряк-шамычлан эртыше всероссийский слётышто шлюпко дене парус йымалне таҥасымаште икымше верыш лектын. Тыгак тудо Марий Элысе военно-патриотический ушем ден юнармий отряд-влак коклаште знаменный тӱшкаште эртаралтше смотр-конкурсышто бронзо призёр лийын.
Марий Эл Республикым вуйлатышын администрацийжын информаций паша пӧлкажын уверже негызеш Е.Эшкинина ямдылен
