Тазалыкым аралымаште – эше ик у рӱдер

Тазалыкым аралымаште – эше ик у рӱдер
19.07.2021

Тазалык аралтыш» нацпроект республикыштына кузе шукталт толмо йодыш дене чумырымо совещанийыште Марий Элын вуйлатышыже Александр Евстифеев Тазалыкым аралыме министерствылан стерилизаций обработкым  ыштыме рӱдерым почаш порученийым пуэн.

«У технологий почеш медицине инструмент-влак ионизаций йӧн дене стерилизоватлалтыт. Тиде  Росатомын проектше. Тыгай рӱдерым почаш ямдылалтман, молан манаш гын пандемий жапыште стерилизаций пеш кӱлешан», – палемден вуйлатыше.

Республикын Тазалыкым аралыме министрже Марина Панькова «Тазалык аралтыш» нацпроектыш пурышо шым региональный проектын илышыш шыҥдаралтмыж нерген ойлен: 12 июльлан 587,9 млн теҥгем кучылтмо, тидыже палемдыме план дене ончымаште 38,6 процент лиеш. Чылаже 1,5 млрд теҥге ойыралтшаш.

«Икымше медико-санитарный полышым пуымо системым вияҥдымаш» проектлан 29,4 млн теҥгем пыштыме. Окса тӱҥ шотышто ФАП-влакым да Йошкар-Оласе больнице пелен улшо вертолёт шичме площадкым чоҥымашке кая. Санитар авиаций кызытеш 6 гана чоҥештен, 8 черлыеҥым эавкуироватлыме, идалык мучко вертолёт 39 рейсым ыштышаш.

«Шӱм-вӱргорно чер-влакым эмлымаш» проект почеш 121,4 млн теҥге ойыралтеш. Волжск рӱдӧ ола да Шернур рӱдӧ район больницылашке 12 единице медоборудованийым шындыме – чылаже 48,2 млн теҥгеаш. Шӱм да вӱгорно чер дене диспансер эскерымаште шогышо пациент-влаклан эмлыме препаратым налаш 55,1 млн теҥгеаш контрактым пеҥгыдемдыме.

«Онкологий чер-влакым эмлымаш» проектым шукташ 1184,4 млн теҥгем кучылташ палемдыме. Республикысе онкологий диспансерыш, Клинический  да Йошкар-Оласе больницылашке 13 тӱрлӧ медицине оборудованийым налаш 88,4 млн теҥгеаш контрактым ыштыме. Республикысе онкодиспансерын поликлиникыжым чоҥымо шотышто проект да смете документацийым кугыжаныш экспертизе сайлан шотлен, каласен министр.

Марий Элын вуйлатышыже онкологий дене черле-влакым пандемий жапыште кузе обслуживатлыме нерген йодыштын. «Нине черле-влак кокла гыч иктат кӱлеш тӱткыш да эмлалтмаш деч посна кодшаш огыл», – палемден тудо.

«Йочан тазалыкшым аралымашым вияҥдыме, ты шотыштак йоча-влаклан медицине полышым пуышо кызытсе жаплан келшыше инфраструктурым ыштымаш программе»  проект почеш ойырымо 61,1 млн теҥге окса йоча отделенийым капитально олмыкташ, Йоча республиканский больницын инфекций корпусшым чоҥаш, «азам ыштыме сертификат-влакын» талоныштым тӱлаш палемдалтын.

Марий Элын вуйлатышыже Александр Евстифеев медицине кадр шотышто поснак палемден каласен. Министр Марина Панькован ойжо почеш, тачысе кечылан шӱдӧ анестезиолог ок сите. «Кадрым ямдылымаш – пеш кӱлешан йодыш, тудым эре тергымаште кучена. Медицине специалист-влакым ямдылыме пашалан кӱлеш окса роскотым шотлен лукман да, шушаш ийын бюджетыш пышташ, йодмашым 1 август марте республикысе Финанс министерствыш колтыман. Мемнан шукыжо ветеран-влак пашам ыштат. Пандемий шарлыме пагытыште вийым муын тыршымыштлан нунылан кугу тау, но отрасльыш толшашлык самырык специалист-влакым ямдылыме але квалификацийым нӧлтымӧ нергенат шоныма​н. Тидым ышташ республикын бюджетше роскотыш пура гынат, оксам ойырена», – ойлен вуйлатыше.

Марий Эл Республикым вуйлатышын  организаций да аналитике виктемжын уверже негызеш  Л.СЕМЕНОВА ямдылен