Россий президентын темлымыж дене келшышын, Марий Эл Республик «Кумдыкысо данный калыкле системе» единый цифр платформо ышталтшаш регион-влак радамыш пурен. Ты платформо мланде да вер гыч верыш кусараш лийдыме объект-влак нерген данныйым тӱрыс да чын чумыраш, тыге мланде-пого комплексым кучылтмо пайдалыкым кугемдаш йӧным пуа.
Единый цифр платформым ыштыме нерген йодышым совещанийыште каҥашыме. Тудым Марий Эл правительстве председательын алмаштышыже Евгений Курмаев эртарен.
Вер гыч верыш кусараш лийдыме ончычсо объект-влакын озаштым рашемдышашлан кадастр пашам комплексно шуктыман, уке гын ӱчашымашан йодышат лектеш. Тений тыгай амал дене 21 тӱжем утла объектым тергыме.
Росреестрын республикысе управленийже велым палемденыт: объект-влакын озаштым але тукым кыл почеш озалан шотлалтше-влакым рашемдаш ок лий гын, верысе самоуправлений орган-влак тыгай погым озадыме семын оформитлышаш улыт.
Совещанийыште тыгак электросеть озанлык объект-влакым чумырымо годым лекше йодышым каҥашеныт.
Россий Федерацийын электросеть комплексым вияҥдыме ончыкылык корныж дене келшышын, республик правительстве тений электросеть озанлыкын озадымылан але муниципальныйлан шотлалтше ончычсо объектше-влакым иктыш чумырымо кугу пашам тӱҥалын. Тыгай объект радамыш электролиний, трансформатор да моло подстанций, энергийым шеледен колтышо пункт да моло оборудований пурат. Нуным чумырен але ик оза кидыш пуэн гына шотыш кондаш да шот дене кучылташ лиеш.
Марий Эл Республикым вуйлатышын администрацийжын информаций пӧлкажын уверже негызеш Ю.Исаков ямдылен
