Тӱрлӧ йодышым каҥашеныт

Марий Эл вуйлатыше Ю.Зайцев граждан-влаклан приемым эртарен. Мутланымаште кумдыкым тӱзатыме, спортплощадкым олмыктымо, аварийный илыме вер гыч еҥ-шамычым кусарыме йодыш-влак тарваталтыныт.

Советский посёлкышто илыше В.Лебедев Советский уремыште верланыше районысо комиссариат воктенысе корным олмыкташ йодын.

Советский муниципальный район администрацийым вуйлатыше А.Трудинов ты корныш кажне ийын тыгыде кӱм оптат, но тиде, мутат уке, корным шотыш кондаш ок полшо манын каласен. Тыге 2024 ийыште заправочный станций гыч Советский районысо военный комиссариат марте корным олмыкташ тӱҥалыт. Тыгак тиде корно ужашыште тротуарым ыштат, уремым меҥгысе тул полшымо дене волгалтарат.

Марий Эл вуйлатыше каласен: «Правительствын пашажын ик тӱҥ направленийже коклаште – тиде военнослужащий-влаклан чыла шотыштат сай йӧным ыштымаш».

Йошкар-Ола гыч Р.Мочаловын йодышыжо Сеҥымаш паркыште скейт-паркым олмыктымо дене кылдалтын.

Рӱдолан мэрже Е.Маслов скейт-паркысе элементлам чӱчкыдын кучылтыт, тушто эре калык шуко манын палемден. Площадкыште улшо южо ужашыжым пытартыш кок ийыште олмыктымо. 2024 ийыште тиде спортплощадкым кугу ачалыме паша вуча. Тидым вес ийын май мучаш марте ыштен шуктышаш улыт.

Йошкар-Ола гыч Н.Гневашева Димитров уремыште верланыше 85-ше №-ан аварийный пӧртыштӧ илыше еҥ-влакым вес вере кунам кусарат, тидым могай жапыште ыштат манын йодын.

Е.Маслов олан администрацийже кумдыкым комплексно вияҥдыме программе кышкарыште аукционный процедурым увертараш, ты программе дене келшышын, аварийный пӧртыштӧ илыше-влакым вес вере кусараш ямде улмым палемден.

Республик вуйлатыше инвесторын чыла обязательствым шукташ кӱлмӧ йодышым контрольыш налаш кӱштен.

Марий Эл Республикым вуйлатышын администрацийжын информаций паша пӧлкажын уверже негызеш Л.ШАБДАРОВА ямдылен