Рушарнян республикыштына, Звенигово-Шолэҥер-Морко кугорнын 38-ше километрыштыже, корно ужашым вӱд мушкын колтен.
Тылеч вара икмыняр жап гычак, 18 шагат гутлаште, Кугыжаныш автоинспекций пашаеҥ-влак тудым авырен налыныт. Ынде водитель-шамыч кызытеш Памар-Кокласола да Суслонгер-Выльыпсола корныла дене кудалыштыт.
Ты верыш прокуратур гыч мо кузе лиймым рашемдаш миеныт.
Тиде ситуацийым Марий Эл правительстве ден республикын Транспорт да корно озанлык министерствыже контрольышто кучат.
– Шулышо лум деч погынышо вӱдым колтышашлан тиде корно ужашыште асфальтым кораҥдаш кӱлын. Ты кугорным тӧрлаташ да уэш кудалышташ йӧршым ышташ манын, «Марий Эл Дорстрой» акционер ушем кӱлеш материалым налын. Корным ме кӱчык жапыште почаш палемдена, – возен Марий Эл вуйлатыше Юрий Зайцев телеграм-каналыштыже.
Тудо палемден: игече чот левештымылан кӧра лум писын шулен да вӱд пуч тудын чот талышнен йогымыжым чытен кертын огыл.
– Кызыт республикысе службо-влак вӱдым колтымо пашам шуктат. Азап лийме верыште 21 еҥ да 13 технике, нунын коклаште Россий МЧС дечат улыт, пашам ыштат. Еҥ-влаклан лӱдыкшӧ уке.
Ситуацийым личный контрольышто кучем, – палемден Юрий Зайцев.
* * *
Эртыше кечылаште игечын кенета пеш писын левештымыжлан да йӱр йӱрмылан кӧра лум пеш вашке шулен. Тиде амал дене республикыште эше икмыняр вере вӱд чот ташлен.
Теве Йошкар-Ола кумдыкыш пурышо Якимсола ялысе да Якимсола выселкысе суртлашке вӱд пурен. Туштат утарыше ден корно службо-влак пашам ыштат, оласе администраций пашаеҥ-влак дежуритлат.
Тиде азап нерген Йошкар-Олан мэржын алмаштышыже Лев Покровский тыге палдарен:
– 25 март йӱдым – 26 март эрдене Монаҥэҥер чот нӧлталалтын, да вӱд кугу кумдык мучко шарлен. Тидлан кӧра Якимсола ялыште да Якимсола выселкыште 11 суртыш пурен. Нине пӧртлаште 31 еҥ ила. 26 март 13 шагат жаплан нунын кокла гыч иктымат эвакуироватлаш кӱлешлык лийын огыл. Тиде верыште утарыше, администрацийын еҥже-влак вӱдыштӧ кошташ лийше средстве-влак да пуш дене дежуритлат, ситуацийым эскерат. Кызыт тыге кӱм оптымо паша кая.
* * *
Советский район Шнаран кундемыште тыгаяк сӱрет палдырныме нерген ойлат.
«Марий Эл» газет редакцийна Печать пӧртыштӧ шымше пачашыште верланен да кӱшычын окна гыч Изи Какшанын нӧлталалтмыжым шочмын эрдене раш ужна. А вет тушто ий эше шулаш веле тӱҥалын. Туге гынат, оласе рӱдӧ пляжым кызытак пелыжым вӱдылтен. Умбакыже эше эҥер мынярлан нӧлталтеш?…
Любовь Камалетдинова
* * *
Вӱд ташлыме шотышто сӱретым республикысе кучемыште контрольышто кучат.
21 гыч 24 март марте Россий МЧС-ын рӱдӧ аппаратшын комиссийже шошо вӱдшорлан да пожар лӱдыкшӧ пагытлан ямде улмо шотышто тергыме пашам эртарен. Ты группым Увер технологий да кыл департамент директорын алмаштышыже Александр Калякин вуйлатен да Марий Эл вуйлатыше Юрий Зайцевым тергыме акт дене палдарен.
– Вич кече жапыште ме муниципал образованийлаште лийынна, объектлам тергенна да субъект шошо вӱдшорлан ямде улмым рашемденна. Икмыняр темлымашым гына ыштенна. Нуныжат организационный сынан веле улыт, – каласен Александр Калякин.
– Тыгай сынан веле улыт гынат, ме нине ситыдымаш-влакымат кораҥдена, – ойлен Юрий Зайцев.
Вашлиймашыште Александр Калякин пожар лӱдыкшӧ пагытлан Марий Элын кузе ямде улмыжым тергыме нерген ойлен да республикыште пожар ваштареш кучедалаш кӱлшӧ оборудований, технике ден ӱзгар, арвер ситыше манын палемден.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
