Школымат, азам ыштыме верымат калык вуча

Школымат, азам ыштыме верымат калык вуча
26.07.2021

Волжскышто лиймыж деч вара Марий Элым вуйлатыше Александр Евстифеев олан социальный да экономике могырым вияҥмыж шотышто икмыняр совещанийым эртарен.

Нунын кокла гыч иктыже  6-шо №-ан школлан у оралтым чоҥымо дене кылдалтше лийын. Каласыман, тушто чоҥымо конструкций-влакын фундаментышт тӧр шинчын огыл, тидлан кӧра каркасын формыжо вашталтын, пырдыжлаже каткалалтын.

«Мом шуйкалыде олмыктыман – тудым эн ончычак ыштышаш улына. Тидын деч вара у оралтым чоҥымо шотышто каҥашыман. Волжскышто лиймына годым тыгай шонымашыш шуынна: тошто школ олмеш уым чоҥыман, вет тунемме вер 2012 ий гычак аварийныйлан шотлалтеш, сандене тудо йоча-влаклан лӱдыкшӧ. Мутлан, тений 1 сентябрь марте олмыктена лийже, мынярлан сита? Кок-кум ийлан веле. Чыла тидым шотыш налын, проектым ямдылыман», – каласен Александр Евстифеев.

Республикын чоҥымаш, архитектур да илыме вер-коммунал озанлык министрже Михаил Степанов ӱшандарен: кызытсе оралтым 20 август марте олмыктен шуктат.

Марий Эл образований да науко министр Наталья Адамова Волжскышто у школым чоҥымо шотышто йодышым роскотым петыраш федерал субсидий дене келшышын решатлаш темлен. Тыге йоча-влаклан ешартыш вер лиеш, нуныжын чотышт пытартыш ийлаште шукемын толеш. Тыштат  Йошкар-Олаште чоҥымо да Медведево посёлкышто чоҥалтше 825 веран школла гайым ышташ темлыме. Наталья Адамова палемден: тидым ышташ манын, эн ончычак Волжск олан администрацийже мланде участкым ойырышаш.

Волжск олан мэрже Евгений Лебедевын мутшо почеш,  школ шуко еҥан микрорайонышто верланен, тудо вияҥын толеш. 2016 ийыште тунемме верыште 380 икшыве шинчымашым поген, 2018 ийыште – 430, тений парт коклаш 600 утла йоча шинчеш.

«Сай сӱрет. Россий Федерацийы Просвещений министерствыш проектым ышташ йодмашыште тидым палемдыман», – каласен регионым вуйлатыше.

Марий Элым вуйлатышын вес совещанийже Волжскысо рӱдӧ эмлымвер пелен азам ыштыме отделенийлан оралтым чоҥымо дене кылдалтын. Ушештарена, чоҥымо пашажым тений январьыште тӱҥалме. Но, Михаил Степновын мутшо почеш, подрядчик ончылныжо шындыме задачым жапыштыже ок шукто, график деч тылзат пелылан почеш кодын.

«Республик мучко чоҥымо паша ятыр вере кая, туге гынат тыге лийшаш огыл. Калык вуча. Паша умбакыже вияҥшаш, график дене тӧр ыштыман», – каласен Александр Евстифеев «Марспецмонтаж» АО-м вуйлатыше Хамза Башировлан. 

Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен