Школ жапыштыже чоҥалтшаш, но…

Марий Элым вуйлатышын пашажым жаплан шуктышо Юрий Зайцев Килемар районысо Кымья ден Йошкар-Оласе «Юбилейный» микрорайонышто школлам чоҥымо пашам мучаш марте шуктыдымо концессионер-влак шотышто мерым приниматлаш кӱштен.

«Концессий ойпидыш почеш проект-шамычым илышыш пуртымаште кызыт кугу нелылылык вашлиялтеш. Чоҥымо паша дене умбакыже мом ыштыман? Организаций вуйлатыше-влак дене мутланенна, но нунын могырым умылымаш огеш шижалт. Тӱҥалме пашам мучаш марте шуктат манын, чыным ойлаш гын, ом ӱшане. Санденак ты йодыш шотышто каҥашаш кӱлеш», – палемден тудо да ешарен: Кымья школым чоҥымо площадкыште ужмо сӱрет тудым моткоч тургыжландара.

Чоҥымаш, архитектур да илыме вер-коммунал озанлык министр Михаил Степановын увертарымыж почеш, кок объектшымат тений кеҥежым чоҥен шуктышаш улыт ыле, но нуно тидын ыштен огытыл, сандене ойпидышын условийжым пудыртеныт . Йошкар-Оласе «Юбилейный» микрорайонышто 850 веран тунемме тӧнежым чоҥаш концессионер-влакын разрешенийышт уке – кугыжаныш экспертизын иктешлымашыжым налын огытыл. «Мыланна тудыжым технический ужашлан гына пуэныт. Смете почеш экспертизе умбакыже шуйна. Чоҥымо дене кылдалтше ситыдымаш-шамыч улыт, сандене, нунын кораҥдымеке гына разрешений пуалтеш», – каласен Михаил Степанов. Тудын мутшо почеш, школым шушаш ийын чоҥаш лиеш, но тидлан окса дене кылдалтше йодышым решатлыман.

Килемар район Кугу Памъялыште верланыше школ шотышто ойлаш гын, кызытлан тушто оралтылан фундамент ямде, пырдыжым нӧлтат, вӱд пуч да канализаций сетьлам монтироватлат, стадионым шотыш кондат. «Просвещений» нылымше концессий компаний у подрядчикым кычалеш.

Чоҥымо пашам жапыштыже ыштен шуктыдымылан концессионер-влаклан неустойкым тӱлаш претензийым колтымо. Палемдыме кок объект шотышто Юрий Зайцев Чоҥымаш, архитектур даа илыме вер-коммунал озанлык министерствыште кажне арнян совещанийым эртараш кӱштен.


Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен