Школ коллектив дене черетан вашлиймаш

Школ коллектив дене черетан вашлиймаш
01.12.2014
Марий Эл Республикым вуйлатыше Л.Маркелов Медведево поселкысо кумшо номеран школыш миен.
 
Ты тунемме вер ойыртемалтше, молан манаш гын тушто археологий тоштер, талантан йоча-шамычым вияҥдыме рӱдер, музык, йоча да самырык-влаклан спортшкол-шамыч пашам ыштат. Школышто физикым, математикым, химийым келгын тунемыт. Икшыве-влак коклаште патриотизм кумыл утларак вияҥже манын, кодшо ийын кок кадет классым почмо. Тушто кызыт 80 йоча тунемеш.
 
Марий Эл вуйлатыше эн ончычак школ тоштер дене палыме лийын. Тыште тӱжем утла экспонат уло, тушеч шымшӱдыжӧ – археологий ӱзгар-влак. Тоштерым вуйлатыше Игорь Панов республикым вуйлатышылан экспонат-влакын музейыш логалме историйыштым каласкален.
 
Умбакыже Леонид Игоревич «Идалыкын туныктышыжо-2014» муниципальный конкурсын призержо Ирина Максимован «Шонымашем почын пуышо тӱням» лӱман урокыштыжо лийын. Тӱҥалтыш класслаште творческий мастарлыкым шуарыше урокышто йоча-влак республикым вуйлатышылан шке шонымашыштым каласкаленыт. А луымшо классыште тунемше-влак дене пырля Марий Эл вуйлатыше математике предмет дене задаче-влакым ыштен. Тылеч посна музык ден спортшколышкат ончалын да ик ӱдыр дене ӱстембал теннис дене модын. Каласыман, кызыт верысе спортшколыш кандашшӱдӧ утла йоча коштеш.
 
- Ты школ ойыртемалтше, шуко профилян, эксперимент шотан. Тыште йочалан шке талантшым почаш чыла йӧн ышталтын, - каласен Л.Маркелов.
 
Марий Эл Республикым вуйлатыше дене вашлийме годым туныктышо-влак ятыр кӱлешан йодышым тарватеныт. Нуным республик вуйлатышын Россий президент дене пытартыш вашлиймаш годым каҥашыме, республикын, рӱдолан вияҥмыж шотышто йодыш-влак тургыжландарат.
 
- Марий Эл правительствын планыштыже - у кӱварым чоҥен пытараш, тыгак рӱдола воктене йыр корным чоҥымаште вашталтышым пурташ. Тылеч посна «Акашевский» чыве фабрикым умбакыжат вияҥдаш. Тиде республикыште у паша верым почаш полша. Медведево районыштак ты инвестпроектлан кӧра 300 паша вер лектын. Тыгак тений Медведево районышто, калыкым тошто пӧртла гыч кусарыме программе дене келшышын, ик у пӧртым сдатлышаш улыт, вес ийын эше кок пӧрт чоҥалтшаш. А вес ийын республик мучко чоҥаш палемдыме коло ФАП гыч кокытшым Медведево районышто нӧлташ тӱҥалыт, - палемден республикым вуйлатыше.
 
Марий Эл Республик Вуйлатышын мер кыл ден увер виктемже
Кусарымаш - Л.Шабдарова (газет "Марий Эл")