Шкеныштын инноваций рӱдерышт лиеш

Шкеныштын инноваций рӱдерышт лиеш
07.10.2014
Марий Элым вуйлатыше Л.Маркелов Йошкар-Оласе «Геникс» научно-производственный фирмыште лиймыж годым дезинфекцийлык пеҥгыде ден вишкыде средствым ямдылыме шотышто шкеныштын инноваций рӱдерым шыҥдарыме дене палыме лийын.
 
У корпусын кумдыкшо 2,5 тӱжем квадрат метр лиеш. Кызыт шке элыште лукмо у оборудованийым вераҥдат. Л.Маркелов, фирмын вуйлатышыже-влакын производствым вияҥдыме да уэмдыме шотышто тыршымыштым кӱкшын аклен, тыге пайдалын ыштыше собственник-шамычлан верысе власть велым полшаш эре ямде улмым палемден.
 
- Предприятийын директоржым мый новатор семын аклем, молан манаш гын Геннадий Степанович производствым эреак саемден толеш. Пытартыш лу ийыште тиде предприятийын илышыш пуртымо кумшо инвестиций проект, - каласен Л.Маркелов. – Кызыт 1,5 тӱжем квадрат метр кумдыкан складым чоҥымо шотышто проектым шыҥдараш ямдылалтыт. Шке производствым кумдаҥден толшо да республикым вияҥдымашке кугу надырым пыштыше тыгай чулым вуйлатыше мыняр шукырак лиеш, властьынат социально-экономический задачым шуктымаште йӧнжӧ утларак кугемеш.Конкурент-шамычым ончылташ у научный разработкым ужын шуктымаш да кучылтмаш полша, маныт предприятийыште.
 
- Мемнан продукций качестве шот дене тӱнямбалне ик эн сайлан шотлалтеш, сандене конкурентна уке гаяк, - палемден предприятий директор Г.Никитин. – Верыште пыртлан тошкыштат гынат, конкурент-влак тунамак ончылтат. Сандене у дезинфицироватлыше да мушшо средствым ий еда уэмден лукташак тыршена. Кызыт шкенан ученый-влакын ямдылыме 75 тӱрлӧ сатум луктына, эшеат ешараш шонена.
 
«Геникс» НПФ-н сатужо кызыт Российысе чыла регионыш, Казахстаныш, Грузийыш, Узбекистаныш, Украиныш, Арменийыш, Молдавийыш, моло вере кая. «Республикын правительствыже полшен ок шого гын, тыгай сеҥымашке шуаш неле лиеш ыле. Мемнан пашанам эреак эскерымыжлан Леонид Игоревичлан таум каласем. Кызытат грант пашаште участвоватлаш темлен. Инноваций рӱдерыште мемнан производствым науко ончыко шӱкаш тӱҥалеш», - палемден Г.Никитин.
 
Инноваций рӱдерыште жаплан келшыше лабораторий лиеш. У проектын чумыр акше предприятийлан 100 миллион утла теҥгеш шуын. Тудо тений декабрьыште пашам тӱҥалшаш. Ешартыш паша вер лектеш, сатум лукмо кугыт кугемеш, бюджетыш налог лу утла процентлан шукырак пураш тӱҥалеш. 
 
Марий Эл Республик Вуйлатышын мер кыл ден увер виктемже
Кусарымаш - А.Андреев (газет "Марий Эл")