Шке калыкшым йӧратен

Шке калыкшым йӧратен
06.10.2017
6 октябрьыште марий сылнымут классик Сергей Григорьевич Чавайнын шочмыжлан 129 ий темме лӱмеш национальный лудмыверыште торжественный мероприятий эртен. Пайрем годым  тудын лӱмеш посна литературный кабинетым  почыныт. Вет 1982 ий гыч лудмывер С.Г.Чавайнын лӱмжым нумалеш.
 
«Мыйын ик кугу шижмашем уло. Тиде - шке калыкем йӧратымаш. Шке калыкым йӧратымаш преступленийлан шотлалтеш гын, мыйым наказатлыза», - возен шке жапыште С.Г.Чавайн. Сандене кызыт, марий калыклан тудын  ыштыме суапшым аклен, тыгай посна кабинетым почмым сай ошкыллан шотлыман.
 
Пайрем литераторын бюстшо ончыко пеледыш аршашым пыштыме да тудын «Ото» икымше марий почеламутшым, моло произведенийжым лудмо дене тӱҥалын. Лудмыверын  холлыштыжо М.Шкетан лӱмеш марий драме театрын артистше-влак, тыгак «Шокто, гармонь» йоча фольклор ансамбль   сылнымут да сем, куштымаш ден куандареныт. Саламлыме шомакым Марий Элын тӱвыра, печать да калык-влакын пашашт шотышто министр Михаил Васютин, Марий Эл Кугыжаныш Погын председательын алмаштышыжын полышкалыжыше Александр Петров да молат ойленыт.
 
Вара чылан лудмыверыште С.Г.Чавайн лӱмеш сылнымут кабинетлан ойырымо пачашыш кусненыт. Тушто чылажат - стиль, мебель, интерьер арвер, книга - марий классикын илыме  да пашам ыштыме пагытшым ушештара. С. Г. Чавайнын илыш корныжо, творчествыже дене кылдалтше ятыр литературым, архив материалым, фотографийым ятыр чумырымо. Кабинетым почмашке литератур, журналистике аланыше тыршыше лӱмлӧ еҥ-влак толыныт ыле. Нунын коклаште Чавайнын уныкаже Сергей Юрьевич ден кугезе уныкаже Юрий лийыныт. Сергей Юрьевич кызыт Калыкле резидент школышто пашам ышта. Тудын ойлымыж почеш, кочажын шочмо кечыжым ешыште эре кугу пайрем семынак палемдат.
 
Кабинетыште С.Г.Чавайнын «тукым пушеҥгыжымат», Чавайнур ял нерген возымо книгамат, тыгак шкенжын произведенийже-влакымат кидыш налын ончалаш лиеш. Пайремыш толшо-влак лудмыверын пашаеҥже-влаклан тыгай йӧным ыштымыштлан тауштен ойлышт. А теве С.Г.Чавайнын шочмо ялжын эргыже Анатолий Смирнов кызыт тудын илыш-корныжо, шочмо ялже нерген посна научно-популярный книгамат ямдыла. Тиде кечын Чавайнурысо литератур да этнографий комплексыште Чавайн лудмаш эртен..
 
 
С.Носова.
Снимкылаште: классиклан пӧлеклалтше кабинетым почмо годым. 
Авторын фотожо.