Юрий Зайцев Марий Эл Республик вуйлатыше должностьыш шогалын
Марий Эл Республикын вуйлатышыжлан сайлыме Юрий Зайцевын должностьыш шогалме торжественный церемонийже 23 сентябрьыште Марий Эл Кугыжаныш Погынын 30-шо сессийже кышкарыште эртаралтын. Тушто Россий Федераций Президентын Юл кундем федеральный округышто полномочный представительже Игорь Комаров лийын.
Мероприятийыш Марий Эл деч сенатор-влак Константин Косачев ден Сергей Мартынов, Марий Эл правительстве еҥ, Кугыжаныш Погын депутат-влак, кугыжаныш кучемын исполнительный да суд органже-влакын, кучемын федеральный органже-влакын территориальный подразделенийлаштын вуйлатышышт, республикысе олала ден район администраций-влакын вуйлатышышт, конфессий, мер ушем-влакын еҥышт, тӱшка информаций средствыла гыч еҥ-влак ушненыт.
Почетный караулын офицерже-влак Преображенский полкын марш семже почеш залыш Россий Федерацийын да Марий Эл Республикын тистыштым, Россий Федерацийын да Марий Эл Республикын Конституцийыштын посна эксземплярыштым, Штандартым да Марий Эл Республикын Знакшым пуртеныт.
Чумыр марий йоча хорын участникше-влак Россий Федерацийын да Марий Эл Республикын гимныштым йоҥгалтареныт. Нуно тыгай торжественный церемонийыште икымше гана лийыныт.
Марий Элын Рӱдӧ сайлымаш комиссийжын председательже Ирина Татаринова сайлымашын иктешлымашыж нерген ойлен да Юрий Зайцевлан удостоверенийым кучыктен, тыгак инаугураций дене саламлен да регионын сай илышыж верч кугу лектыш дене пашам ышташ тыланен.
«Тений 14 сентябрьыште Марий Эл Республикын Рӱдӧ сайлымаш комиссийже пунчалын: Марий Эл вуйлатышым сайлымашым лийшылан да чынлан шотлаш. Юрий Викторович Зайцевым Марий Эл вуйлатышылан сайлымылан шотлаш. Тудо 141 тӱжемат 666 йӱкым поген. Тиде – 82,44 процент. Вес семынже, йӱклымашке ушнышо-влакын пелыже деч шукырак йӱк», – ушештарен Ирина Татаринова.
Тылеч вара Юрий Зайцев присягым марла да рушла ойлен, тыгодым кидшым Россий Федерацийын да Марий Эл Республикын Конституцийыштын церемониальный экземплярлашкышт пыштен.
«Калыклан, Россий Федерацийын Коституцийжылан, Марий Эл Республикын Конституцийжылан ӱшанлын служитлаш, нуным аралаш да шукташ, айдемын да гражданинын праваштым да эрыкыштым пагалаш да оролаш, Марий Эл Республик вуйлатыше кӱкшӧ обязанностьым кӱлеш семын шукташ товатлем», – каласен Юрий Зайцев.
Россий Федераций Президентын Юл кундем федеральный округышто полномочный представительже Игорь Комаров Марий Эл вуйлатышым саламлен да Юрий Зайцевын республикыште илыше-влакын ӱшаныштым кӱчык жапыште сулымыжым палемден. Тидым йӱклымашын иктешлымашыже раш пеҥгыдемда манын ойлен. Тудо каласен: Марий Элыште тӱрлӧ национальностьян калык келшен да ваш полшен ила. Республикын историй да тӱвыра поянлыкше кугу, туристический йӧнжӧ сай. Регионышто оборонно-промышленный комплекс предприятий-влак келшышын пашам ыштат, ялозанлык, IT-индустрий вияҥыт.
«Президентын да Россий правительствын полшымышт дене регионым вияҥдыме индивидуальный программе илышыш шыҥдаралтеш. Юрий Викторович, тендам да Тендан командыдам кугу паша вуча. Еҥ-влакын доходыштым кугемдыман, власть ден тыште илыше-влак дене сай вашкылым ыштыман, кугыжаныш услугын качествыжым нӧлталман. Еҥ-влакым, нунын йодмыштым колышт моштыман, лекше неле йодыш-влакым жапыштыже решатлыман. Таче кӱшыл должностной лицан ик эн ончыч шуктышаш пашаже – Россий Федераций Президент Владимир Владимирович Путинын частичный мобилизаций шотышто указшым шуктымаш.
Мемнан дене келшыдыме эл-влакын санкционированный темдымышт условийыште экономикылан да социальный сферылан лӱдыкшӧ кушкеш. Сандене икоян обществынам арален кодыман. Да тиде пашаште регинысо кучем орган-влак федеральный структур-влакын территориальный подразделенийышт, верысе самоуправлений, бизнес, общественность ваш келшен тыршышаш улыт. Тыге гына ме нелылыкым сеҥен кертына. Кугыжаныш Вуйлатышын указыштыже социально-экономический стабильность лийме, Российыште калыкым аралыме шотышто палемдыме кугу масштабан задачым решатлыман. Регионысо калыкын илышыжым саемдышашлан да экономикым икшырымын вияҥдышашлан кризис ваштареш виктаралтше ешартыш мерым приниматлыман. Пагалыме Юрий Викторович, ӱшанем: Тендан профессионализмда, поян вуйлатыме да илыш опытда, а тӱҥжӧ еҥ-влакын полышышт Тыланда Марий Эл Республикым келшышын вияҥдаш полшат. Тыланда да командыланда сеҥымашым тыланем», – каласен Игорь Комаров.
РФ ФС Федераций Совет председательын алмаштышыже, Марий Эл Республикын кугыжаныш кучем исполнительный органже деч представитель Константин Косачёв Юрий Зайцевым Валентина Матвиенкон лӱмжӧ дене саламлен.
«Тендан цельыш шуаш да шындыме задачым кӱлын решатлаш тыршымыда российский государственностьым пеҥгыдемдаш, Марий Эл Республикын социально-экономический куатшым вияҥдаш, тысе калыкын илышыжым саемдаш полшат. Ӱшанем, Россий Федерацийын Федеральный Собранийжын Федераций Советшын Марий Эл Республикын кугыжаныш кучем органже-влак дене вашкыл ончыкыжымат лектышан лиеш. Кӱкшӧ кугыжаныш постышто пашам ыштымаште Тыланда кугу кӱкшытыш шуаш тыланем», – Россий парламентын кӱшыл палатыжын спикерже Валентина Матвиенкон саламлымажышым лудын сенатор.
Константин Косачев ешарен: сайлымаш деч ончыч Юрий Зайцевын Валентина Матвиенко дене вашлиймашыже лийын. Тушто лишыл жапыште шуктышаш паша шотышто план ышталтын. Да тиде планын кульминацийже шушаш ий шыжым Федераций Советыште Марий Эл Республикын Кечыже-влакым эртарымаш лиеш.
Россий Федераций Кугыжаныш Думын депутатше Сергей Казанков Кугыжаныш Думо председатель Вячеслав Володинын саламлымашан телеграммыжым лудын.
«Мылам Кугыжаныш Думын изи да кокла предпринимательство шотышто комитет председательын икымше алмаштышыже семын мемнан республикын производительже-шамыч деч Юрий Викторовичын производствым, ялозанлыкым, изи бизнесым вияҥдымылан кӱлеш тӱткышым ойырымыж нерген колышташ сайын чучеш. Молан манаш гын лач тыге республикым нӧлталаш лиеш. Производство икымше верыште лийшаш. Да мылам Марий Элын шочшыжо семын келша, кузе Те соцкылым чолган вӱдеда, огыда вожыл, Тендан илышыште мо ышталтеш, шылтыде возеда, еҥ-влак вигак Тыланда йодышым пуэн кертыт, чын вашмутым налыт. Тидлан кӧра Тендан чапда, Тендан деке пагалымаш, мутат уке, кушкыт. Тендан пашадалан моткочак кугу тау. Ончыкыжымат тудо вияҥаш гына тӱҥалеш, а мемнан исполнительный ден законодательный кучем-влак коклаште кылна пеҥгыдемаш тӱҥалеш манын ӱшанем», – каласен Сергей Казанков.
Йошкар-Олан да Марий Митрополит Иоанн Москвасе да Уло Русьын Патриархше Кириллын лӱмжӧ дене республик вуйлатыше Юрий Зайцевым саламлымекше, Марий Элыште илыше-влак да Руш Православный черке верч поро пашам шукташ Архипастырский благословенийым ыштен.
«Святейший Тыланда тидлан шке благословенийжым пуа. Тыглай огыл жапыште Юмо Тыланда мемнан марий кундемын вуйлатышыже лияш пӱрен. Тендам Кугу служитлымаш вуча. Тудым намыс дене келшышын шуктыза. Шке шӱмдам почса, да кажне еҥ тушто шке вержым мушаш», – каласен Йошкар-Олан да Марий Митрополит Иоанн.
Республикын Кугыжаныш Погынжын председательже Анатолий Смирнов палемден: телеграмме-влак Россий Федерацийын правительстве председательже Михаил Мишустин, Россий правительстве председательын алмаштышыже Марат Хуснуллин, РФ йот эл-влак паша министр Сергей Лавров, РФ Рӱдӧ сайлымаш комиссий председатель Элла Памфилов да ятыр моло официальный лица, элын чыла субъект вуйлатышыж деч пурен.
Торжественный церемоний мучаште Юрий Зайцев ойлен:
«Мылам тыгай кугу ӱшаным ыштымылан Россий Федераций Президент Владимир Владимирович Путинлан тауштем (признателен). Марий Эл Республикыште илыше-влаклан ыштыме ойырен налмашыштлан, мыйын планем да республик верч тыршаш шонымем поддержатлымыштлан уло кумылын таум ойлме. Россий Федераций Президентын Юл кундем федеральный округышто полномочный представительже Игорь Анатольевич Комаровлан, кучемын федеральный органже-влаклан эреак тӱткышым ойырымыштлан да республиклан полшымыштлан таум каласем. Марий Эл Республикын кажне еҥже ончылно моткочак кугу ответственностьым шижам. Ӱшандарен каласен кертам: мыйын вием, шонымашем шуко да республикым вияҥдаш, еҥ-влакым илыш качествыштым кугемдаш йӧнем уло», – палемден Юрий Зайцев.
Марий Эл вуйлатыше ешарен: республикыште пашам ыштыме 4 тылзе жапыштыже чыла районышто, промышленностьын, ялозанлыкын тӱрлӧ отраслян предприятийлаштышт, социальный объектлаште лийын.
«Еҥ-влак дене мутланымаш, нунын тургыжланымашышт, тыланымашышт, вашталтышлан ӱшанышт мылам моткочак кӱлешан лийын. Кумдыкым тӱзатыме, медицине обслуживанийын, образованийын качествыштым саемдыме, нунын дене чылан пайдаланен кертме йӧныштым кугемдыме, промышленностьым, ялозанлыкым, IT-индустрийым, туризмым вияҥдыме дене кылдалтше тӱҥ стратегический направлений-влак лачшымак республикыште илыше-влакын темлымашыштым шотыш налын палемдалтыныт. Республикын да муниципал кучем орган-влакым кугу паша вуча. Мый федеральный рӱдерын полышыжлан эҥертен лектышыш шуаш палемдем. Докладым ыштымем годым Владимир Владимирович Путин республикым вияҥдыме шотышто темлымашем-влакым поддержатлен, – каласен Юрий Зайцев. Вара мутшым шуен: – Шочмо элна касвелын тӱшка лӱдыктылмашыж ваштареш шога. Тудын суверенитетшым да лӱдыкшыдымылыкшым аралышашлан чыла мерым приниматлыман, мемнан ончылно Верховный Главнокомандующий могай задачым шында, тудым шуктыман. Марий калыкын йӱлажым да тӱвыражым арален кодымым кӱлешанлан шотлем. Мемнан кумда элнан кумдыкыштыжо йӱла дене кылдалтше поянлыкым арален кодыман, самырык-влакым патриотизм шӱлышеш куштыман. Таче ме пырля кайышаш корно тӱҥалтыште улына. Лектышан командный паша регионым социально-экономически вияҥдыме кӱкшытым, еҥ-влакын илыш качествыштым нӧлталтме шотышто шындыме задаче-влакым шукташ полша. Ончыко гына!» Тыге каласен республик вуйлатыше.
Марий Эл вуйлатышын инаугурацийже кузе эртымым регионышто илыше да чыла кумылан-влак МЭТР телеканалыште, тыгак «Марий Эл» ГТРК-ан, МЭТР-ын, «Марийская правда» ден «Марий Эл» республиканский газет-влакын, «Йошкар-Ола», «Медиапоток» ИА-н сайтлаштышт, Марий Эл Республикын правительставыжын ВКонтакте воткылысе пабликыштыже вияш эфирыште ончен кертыныт.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен
