Эртыше кечылаште Марий Эл вуйлатыше Юрий Зайцев Советский да Российский лётчик, отставкысе подполковник Российын Геройжо Владимир Шарпатов дене вашлийын.
В.Шарпатов 1996 ийыште Афганистаныште ИЛ-76 самолётшым тушман деч поген налын, экипажше дене плен гыч утлен. Владимир Звенигово район Красногорский посёлкышто шочын, кызыт Тюменьыште ила. Рвезе изинекак лётчик лияш шонен, кок кӱшыл авиационный образованийым налын. Черетан рейсыш лекмыж годым тудо командыж дене талиб-шамыч деке пленыш логалын. Тушто нуным идалык да 13 кече кученыт.
Лётчикын подвигшылан да экипажын еҥже-влаклан «Кандагар» фильм пӧлеклалтын.
– Мемнан элна верч подвигым ыштыше, тыгай легендарный айдеме, Российын патриотшо дене вашлияш – куан. Ме чыланат Тендан дене кугешнена, – манын регион вуйлатыше Ю.Зайцев.
Владимир Шарпатов Марий Элыш, шочмо кундемышкыже, толаш йӧрата.
– Юрий Викторович, мый пеш куаненам Тендан поро мутланда. Шочмо мландыште лияш – моткоч кугу куан. Мый автобиографический почеламутым возенам. Тӱҥалтышыже тыгайрак: «Моё сердце в Сибири, а на Волге душа. Я влюблён в эти шири, вся страна хороша!», – палемден Владимир Шарпатов.
Легендарный лётчик Ю.Зайцевлан шке возымо почеламут сборникшым пӧлеклен (шукышт Марий кундем нерген) да «За волю к жизни» юбилейный медальым кучыктен. Медальжым Кандагар гыч куржмыштлан 25 ий темме лӱмеш лукмо.
В.Шарпатов шуко награде дене палемдалтын. Тудын лӱмжым 1-ше №-ан Красногрский кыдалаш школлан пуымо.
Марий Эл Республик вуйлатышын организаций да аналитике виктемжын уверже негызеш Е.Эшкинина ямдылен
