Шӱкым ойыркалаш

Йошкар-Ола ден Шернурышто шӱкым ойыркалыше комплексым чоҥаш палемдалтеш. Нунын акышт 921 миллион да 477,4 миллион теҥге шогаш тӱҥалеш. Объектлам кутырен келшыме проектла негызеш чоҥымо йодыш ончалтеш.

Марий Эл вуйлатыше Юрий Зайцев да Россий экологий операторын генеральный директоржо Денис Буцаев паша вашлиймаште лачак финансироватлыме йодышым каҥашеныт. Нине кок объектым чоҥаш инвестор-влак дене Марий Эл правительстве кодшо ийын декабрьыште кутырен келшен.

«Нуно идалыкыште 120 тӱжем тонн пеҥгыде коммунал отходым ойыркалаш тӱҥалыт. Кызыт кок объект шотыштат проект ден смете документацийым ямдылыме, кугыжаныш экспертизе сай акым пуэн», – каласен Денис Буцаев.

Тудын инвестиций йодыш дене алмаштышыже Сергей Королёвын рашемдымыж почеш, проект-влакын чумыр акышт 1,4 миллиард теҥгеш шуэш. Россий экологий оператор полшымо шот дене объект-влакын акышт гыч 95 наре процентшым ойырен кертеш. Проектыш пыштыме займын кугытшо икымше объект почеш 857 миллион наре теҥгеш да кокымшо объект почеш 436 миллион наре теҥгеш шуын сеҥа.

Марий Эл вуйлатыше палемден: тыгай комплекс-влак шӱкым ойыркалыме веле огыл, тыгак тудым перерабатыватлыме сомылым шуктен кертыт, но чоҥымо нерген мучаш марте кутырен келшышашлан соглашенийын чыла условийжым шымлен налаш, бюджетлан могай нелыт лиймым да объект-влакын могай пайдам пуэн кертмыштым рашемдаш кӱлеш.


Марий Эл вуйлатышын администрацийжын информаций паша пӧлкажын уверже негызеш Ю.Исаков ямдылен