Сайжат ятыр, ыштышашыжат шуко

Сайжат ятыр, ыштышашыжат шуко
04.08.2017
1 августышто Москва воктенсе Горки резиденцийыште Марий Элым вуйлатыше А.Евстифеев ден Россий правительстве председатель Д.Медведев вашлиймышт годым регионысо ялозанлыкысе ошкыл да социально-экономически вияҥме нерген йодышым тарватеныт.
 
А.Евстифеев республикым вуйлатыше семын кум тылзат  пеле ыштыме жапыштыже лийше вашталтыш дене палдарен. Эн ончыч бюджет пашаеҥ-влак ончылно улшо парымым тӱрыс тӱлен пытарыме нерген каласен. «Икмыняр ийыште туныктышо-влакым, отпускнойым тӱлен, икымше гана жапыштыже канаш колтымо», - палемден тудо. Шуко проблемым: пӱсӧ социальный ситуацийым кораҥдаш, социально-экономический положенийым  саемдаш полышым пуымылан премьер-министрлан таум ойлен. Тазалыкым аралыме пашаште сай вашталтыш нерген каласен. «Эм ден препаратым яра налаш праван-шамычлан кажныштлан рецепт почеш чыла тӱрлыжымат тӱрыс ситарыме. Тидлан федеральный правительстве кугу полышым ыштен», - палдарен А.Евстифеев.
 
Тыгак налогым тӱлымаште, промышленный производство кушмаште, ялозанлыкым вияҥдымаште сай вашталтыш нерген ойлен, Марий Элыште экологически яндар да чапле качестван кочкышым ямдылымым поснак ойырен палемден. Республик шылым мыняр кӱлмӧ деч кум пачаш нарылан шуко луктеш, кок кумшо ужашыжым ӧрдыжкӧ ужален кертеш. Каза шӧрым ыштен налмаште ончылно кая. «Звениговский» шыл комбинатын продукцийжым мокталтен да предприятийын пашаж дене кӱчыкын палдарен.
 
- Республикыште вольыкым ончышо, тидын шотыштак шӧрым ыштен налше, у предприятий-влак умбакыжат шочшаш улыт. Ялозанлык инвестицийым шуко йодеш. Республикдам лач ялозанлык пашам вияҥдыме корно дене кайышым ужыда гын, инвестицийым кычалман, - каласен Д.Медведев.
 
Республикым вуйлатыше вашлиймашым иктешлышыжла «ТАСС» увер агентствылан комментарийым пуымыж годым палемден:
 
- Оршанке районышто «Шойбулакский» ЗАО комбикорма заводым чоҥа. Проектын акше – 200 миллион утла теҥге. «Лукоз» агрохолдинг кок кугу инвестиций проектым илышыш пурта: каза шӧр гыч йоча кочкышым ямдылыше заводым чоҥа да казам ешара. Ты пашаш 700 миллион утла теҥгем пышташ шона. Шушаш ийыште лӱштымӧ ушкалым ик тӱжем  вуйлан ешарыме лиеш. А тений талук мучаш марте ик ушкаллан шотлымаште лӱштышым 5526 литр гыч 5700-5750 литр марте шукташ палемдалтеш. Тылеч посна «Звениговский» агрохолдинг лишыл кум ийыште лӱштышаш ушкалым 6 тӱжем гыч 9 тӱжем вуй марте ешараш сӧрен.
 
А.Евстифеев республикысе властьын кугу производитель, тыгак шке озанлыкым кучышо-шамычлан чыла семынат полшымыжо, республикыште пайдам пуыде кийыше ялозанлык мландым курал-ӱдаш пӧртылтымӧ нерген ойлен. Тений гына куд тӱжем наре гектар пӧртылшаш.
 
Марий Эл Республик Вуйлатышын мер кыл ден увер виктемже
Кусарымаш - А.Андреев (газет "Марий Эл")