Сай ончыкылыкым сӧрышӧ кыл

19 декабрьыште Марий Элым Вуйлатыше Юрий Зайцев Ульяновск областьын губернаторжо Алексей Русских дене вашлийын. Тудо республикыш кугу делегаций дене пырля пашаче визит дене толын коштын.

Вашлиймаште промышленность сферыште пырля пашам ыштыме, торгово-экономический кылым кумдаҥдыме нерген мутланыме. Марий Элым вуйлатыше уна-влакым саламлен ойлымыж годым кок регион коклаште пырля пашам ыштымаш ончыкыжо кугу пайдам конден кертеш манын. Ульяновск областьын губернаторжо Юрий Зайцевым эртыше шочмо кечыж дене саламлен, республикыш толын коштмыжо могай шонымашым шочыктымыж нерген ойлен да промышленность сферыште пырля пашам ышташ шонымо план дене далдарен.

Ульяновск областьын делегацийже Марий машиностроитель заводыш, Креативный индустрий школыш, «iSpring” ден «TraveILine» компанийлашке миен коштын, кок регионысо торгово-промышленный палате-влак коклаште пырля пашам ыштыме нерген соглашенийым пеҥгыдемдыме, туризм сферыште пырля пашам ыштыме нерген йыргешке ӱстел коклаште мутланыме.

Ульяновск областьын губернаторжо Йошкар-Олаш икымше гана веле огыл толын коштынам, пытартыш ийлаште ола палынак вашталтын, сандене тудо турист-влакын кумылыштым савыра манын палемден. Алексей Русских Марий Элым вуйлатышым регионын промышленный куатше дене палыме лияш   Ульяновск областьыш   миен кошташ ӱжын.


Марий Элым вуйлатышын администрацийжын информаций паша пӧлкажын уверже негызеш П.Шакиров ямдылен