Российыштат ик эн куатле

Российыштат ик эн куатле
31.10.2014
Марий Элыште талукышто пӱктен лукшаш 158,7 миллион муным ямдылыме репродукторым пашашке колтымо.
 
Объектым торжественно почмаште Марий Элым вуйлатыше Л.Маркелов, Россельхозбанк правлений председательын икымше алмаштышыже Б.Листов, Российысе сурткайыкым ашныше-влак ушемын генеральный директоржо Г.Бобылева, Россий Федерацийысе Кугыжаныш Думын депутатше-влак Г.Кулик ден К.Черкасов, «Акашево» агрохолдингын пашаеҥже да ӱжмӧ еҥ-влак лийыныт.
 
Репродукторым почмо годым палемдыме: у производствылан кӧра сурткайык шыл рынкыште ак келшыше лиеш, а тӱҥжӧ – Российыште сурткайыкым ашныше-влаклан пӱктен лукшаш муным чаплырак качестваным да йот элла гыч кондымо дене таҥастарымаште шулдынрак налаш йӧн ышталтеш.
 
- Кызыт икымше категориян муным йот элла деч налына. Тидыже икмыняр нелылыкым луктеш. Ме моткоч кӱлешан объектым чоҥенна. Проект Россельхозбанкын кредитым ойырымыжлан, тыгак Россий правительствын налме кредитын процент ставкыжым пӧртылтымыжлан да инвесторын тыршымыжлан кӧра илышыш шыҥдаралтын. Тудо йот элла гыч кондымо сатум алмаштымаште сай ошкыл семын палдырна, - погынышо-влакым саламлышыжла палемден Марий Элым вуйлатыше Л.Маркелов. – У объект чыве шылым ыштен налме кугытым ешарымаште, тыгак социальный могырымат моткоч кӱлешан. Вет келшыше пашадаран у паша вер-влак почылтыныт.
 
Марий Элым вуйлатыше тидымат палемден: «Инвесторлан полыш семын погылан налогым 50 процентлан иземдыме. Вет тыгай куатле комплексым кучаш неле. Россельхозбанкын полышыжлан ончыкыжымат ӱшанена».
 
Тидлан Россельхозбанк правлений председательын икымше алмаштышыже Б.Листов тыге вашештен: «Акашевский» сурткайык фабрике мыланна тыглай проект веле огыл, жаплан келшыше кӱкшӧ технологиян озанлык. Кызыт банк инвестиций проектын индешымше черетшым финансироватлыме йодышым онча».
 
«Акашево» агрохолдинг республикыштына ынде икмыняр ий производствын тӱрыс циклжым ушышо кумда инвестиций проектым илышыш шыҥдарен толеш. I-II порядке репродуктор районлаште 10 вере 8-ше инвестпроект  почеш чоҥалтеш. Ты проектыште теве мо шотлалтеш:
  • 1-ше черет: алмаштышаш самырык сурткайыкым ашныме 6 вӱта (Ожиганово посёлко) – 2014 ий апрель-ноябрь-ыште пашашке колтымо;
  • муным пӱктымӧ инкубаторий (Яманаево ял) – 2014 ий декабрьыште пашашке колталтеш;
  • кугу сурткайыклан 12 вӱта (Колянур ял) - икмыняр ужашыжым 2014 ий сентябрьыште пашашке колтымо;
  • 2-ш черет: 7 репродуктор – Куэрйымал ял, Марисола села, Кораксола ял - икмыняржым пашашке колтымо, Тулгем, Кужнур, Кугу Шале, Тыгыде Морко яллаште 2015 ийыште чоҥен шуктат.
- Ончыч тыште чара пасу лийын, а таче ме, сурткайыкым ашнен, муным налына. Икымше тӱшка муным Российыште чыве шылым ыштен налше ик эн куатле «Черкизово» компанийлан колтена, машинаже налаш толын, - палемден «Акашевский» сурткайык фабрике ООО-м вуйлатыше Н.Криваш.
 
Палемдыме проектым илышыш шыҥдарымылан кӧра элысе сурткайык отрасльлан пӱктен лукшаш да бройлер муным 15 процентлан ситараш йӧным ышта. Племенной материалым Юл, Урал да Рӱдӧ федерал округлашке колташ тӱҥалыт. 
 
Марий Эл Республик Вуйлатышын мер кыл ден увер виктемже
Кусарымаш - В.Смоленцев (газет "Марий Эл")