Россий Минстройын полышыжо шижалтеш

Москваште Марий Эл вуйлатыше Зайцев ден Россий Федераций чоҥымо да ЖКХ министр Ирек Файзуллин вашлийыныт. Нуно «Юлым тазаҥдымаш», «Яндар вӱд», «Оласе средам йӧнаным ыштымаш» федеральный, тыгак «Илаш йӧрдымӧ илыме верым палынак шагалемдымым обеспечиватлымаш» регионысо проект-влакым илышыш шыҥдарыме да моло пӱсӧ йодыш-влакымат каҥашеныт.

Марий Эл вуйлатыше палемден: калык тӱшкан коштмо кумдык да кудывече-влакым тӱзатыме паша 2023 ий мучко кая. Йӧнан оласе средам ыштыме шотышто VI да VII всероссийский конкурсышто сеҥыше кок кугу проект ноябрь мучаште шукталтеш. Объект-влакын чумыр акышт – 240 миллион теҥге. Тыгак «Звениговын вӱд капкаже: Юл причал воктенысе эҥер сер», «Оласе илыш рӱдӧ вер: Волжск оласе (Марий Эл Республик) Ленин уремын ужашыжым да Тӱҥ площадьым тӱзатыме проект», «Ола лӱмын у семын йоҥгалтмыже. Козьмодемьянск олаште композитор Эшпайын скверже» лӱман проект-влак илышыш шыҥдаралтыт.

«Юлым тазаҥдымаш» федерал проектым ончалаш гын, октябрьыште Параньга посёлкышто канализацийын эрыктыме соооруженийжым уэмдыме, пашан акше 68,8 миллион теҥгеш шуын. Йошкар-Олаште, Марий Турек районысо Косолап, Килемар посёлкышто палемдыме объектлаште паша график деч ончыч кая, идалык мучаште ыштен шуктымо лиеш.

Республикыште илыме вер да коммунал, экологий, кумдыкым тӱзатымаш, аварий лӱдыкшан илыме верла гыч граждан-влакым вес вере кусарыме йодыш-влак тӱрлӧ федеральный проектлан да программылан кӧра решатлалтыт. Объект-влакым нине проектлашке пурташ да палемдыме жапыште шукташ РФ Минстройын полшымыжлан регион вуйлатыше Ирек Файзуллинлан таум каласен.

Тудын мутшо почеш, йӱмӧ вӱдым ситарыше 12 объектым чоҥымо да уэмдыме паша кая, тышеч 9 объектшым тений пашаш колтышаш улыт. 4 вереже паша мучашлалтын. Регионысо проект дене келшышын, аварий лийын кертме лӱдыкшан 85 тӱжем квадратный кумдыкан илыме верым кораҥдыме. «Ышташ палемдыме пашам контрольышто кучем», – каласен Юрий Зайцев.

РФ чоҥымо да ЖКХ министр республикын правительствыжын пашажым кӱкшын аклен.


Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен