Республикым вуйлатыше Юрий Зайцев «Герои Марий Эл. Талешке-влак» кадр программын икымше выпускникше-влаклан дипломым кучыктен.
– Республикыште тиде исторический тат лиеш. Геройна-влак граждан илышысе пашаш куснат. Кучемыште, экономикыште мыланна патриот-шамыч кӱлыт. Шке шинчымашыштым регионым вияҥдымаште кучылташ тӱҥалыт. Корныштыда пиалым тыланем, – палемден Юрий Зайцев.
Россий Федераций Федеральный Погынын VIII созыв Кугыжаныш Думыжын «Единый Россий» партий деч депутатше Александр Борисов выпускник-влакым шокшын саламлен. «Марий Эл специальный военный операцийын ветеранже-шамычлан полшымо шотышто Россий президентын кӱштымыжым чын ыштымым пеҥгыдемда. Те бойлаште пеҥгыдылыкым ончыктенда. Тыныс илышысе пашаштат пеҥгыдылыкда сита манын ӱшанем. Поро корным тыланда!» – ойлен Александр Борисов.
Кадр программын участникше-влакым Марий Эл Кугыжаныш Погынын председательже Михаил Васютин шокшын саламлен.
Регионысо программе республик вуйлатышын тӱҥалтышыж дене 2025 ий февральыште стартым налын. Тудо Россий президент Владимир Путинын темлымыж дене «Время героев» федерал программе дене келшышын ышталтын.
«Герои Марий Эл. Талешке-влак» кадр программын 18 участникшылан «Государственное и муниципальное управление. Герои Марий Эл» дипломым торжественно кучыктеныт.
Нуно тунемме жапыште лекцийлам колыштыныт, практике занятийлаш ушненыт, наставник-влак дене стажировкым эртеныт. Ныл образовательный модуль гыч шогышо курсын тунемме программыже 502 шагат лийын.
Программын участникше, Марий Элын спорт министржын алмаштышыже Андрей Черепанов выпускник-влак лӱм дене регион вуйлатышылан кӱлешан курсым организоватлымыжлан тауштен. «Тунемме программын кажне этапшым шонен ямдылыме. Проект паша-влак дене чынжымак республикысе илышым сай велыш вашталташ лиеш. Ме пайдале шинчымашым налынна. Тендан ӱшандам сулаш тыршена», – палемден тудо.
Регион вуйлатыше Юрий Зайцевын мутшо почеш, 7 выпускник ответственный должностьышто тырша. Тудо моло выпускникланат, келшыше верым муын, Марий Эл, пӱтынь Российын вияҥмаштыже кумылын тыршаш тыланен.
