«Республикна умбакыжат вияҥшаш»

«Республикна умбакыжат вияҥшаш»
29.10.2014
Марий Эл вуйлатыше Л.Маркелов Йошкар-Оласе 23-шо №-ан школын коллективше дене вашлийын. Туныктышо-влак дене мутланымаште тӱрлӧ йодышым тарватыме. Марий Элыште ойыртемалтше архитектуран сылне пӧртлам, тачысе илышлан келшен толшо спортсооруженийлам умбакыжат чоҥаш тӱҥалыт, республикна ончыкшымат моторештшаш, вияҥшаш манын палемден тудо.
 
- Кажне муниципальный образованийыште вияҥаш полшышо вер лийшаш, тиде — школ, эмлымвер, йочасад. Санденак тазалыкым аралыме да тунемме сферыште кугу программе илышыш шыҥдаралтеш, - каласен Л.Маркелов.
 
Республикыште у тунемме вер-влакым чоҥымылан эреак кугу тӱткыш ойыралтын. Теве Йошкар-Оласе але нӧлталташ гына тӱҥалше  «Спортивный» микрорайонышто, Волжский районысо Купсолаште, Курыкмарий районысо Красноволжскышто у школым чоҥаш палемдыме. Волжск олаште у школлан негызым пыштыме. Тений тунемме ий тӱҥалтыште Кужэҥер районысо Руш Шойышто у школ омсажым почын. А яллаште гын ик пу школат кодшаш огыл, нунын олмеш кермыч оралтым ыштышаш улыт. 23-шо №-ан школымат уэмдымаш вуча. Тышке пристройым чоҥат.
 
Вашлиймаште республикым вуйлатыше шке илышыж нерген пуымо йодыш-шамычланат вашештен. Тудо кира спортым, дзюдом, кучедалмашын тӱрлӧ видшым пагалыме, йӱштылаш, коньки дене мунчалташ йӧратыме, шорт-трекым, боксым ончаш кумылан улмыжым палемден.
 
Мучашлан Л.Маркелов школым ончал савырнен, биологий, англичан йылме, автодело уроклаште лийын, тунемше-влак дене мутланен, школ газетын журналистше-шамычлан интервьюм пуэн. 
 
Марий Эл Республик Вуйлатышын мер кыл ден увер виктемже
Кусарымаш - Л.Шабдарова (газет "Марий Эл")