Рӱдолан шӱмжӧ у вийым налын кыра

Рӱдолан шӱмжӧ у вийым налын кыра
28.10.2014
Марий Элым вуйлатыше Л.Маркелов «Йошкар-Оласе 1-ше ТЭЦ» муниципальный предприятийын электросеть цехшын административно-бытовой зданийжым почмаште лийын.
 
Цех пашаеҥ-влак ончылно ойлышыжла, республикым вуйлатыше палемден:
 
- Ты зданийым пашаш колтымым Йошкар-Олан материально-технический базыжым пеҥгыдемдымаште стратегический ошкыл семын ончыман. Объектым тачысе кечын йодмыж дене келшышын капитально чоҥымо, тудо потребитель-влаклан электровийым пуэн шогымаште да тидым тергымаште рӱдолалан шуко ийлан лӱдыкшыдымылыкым ышта. Тидын кӱлешлыкшым ме чылан умылена.
 
Специалист-влаклан пашам ышташышт йӧнан лийже манын, поснак кугу тӱткылыкым ойырымо. Молан манаш гын оласе электросетьын цехше але марте 1923 ийыште чоҥымо зданийыште верланен ыле, тудо чотак шолдырген, техникат тоштемше лийын. Предприятий директор И.Бондарчукын мутшо почеш, цехыште у оборудованийым шындыме, тудын кумдыкшым ешарыме нерген мутат лектын кертын огыл. Куд квадрат метр кумдыкышто кум специалист чотак шыгырнен ыштен.
 
Ынде предприятийысе 200 еҥлан тыршаш веле огыл, канашат чыла йӧн ышталтын. Л.Маркеловлан ончыктымо посна пӧлемыште бильярд, ӱстембал теннис дене модаш ӱстел-влак улыт. Республикым вуйлатышылан тыгак  диспетчер пункт, вискалыме лабораторий, уэмдыме моло пӧлем келшеныт. 
 
«Йошкар-Оласе 1-ше ТЭЦ» МУП рӱдолалан электрический ден шокшо энергийым ыштен лукшо ик эн кугу предприятийлан да шуко тӱрлӧ пашам шуктышо энергетический комплекслан шотлалтеш. Тысе электросеть цех 600 трансформаторный, электровийым шеледыше 30 наре подстанций-влакым, ик тӱжем наре километр кабель линийым да юж  дене шуйнышо 300 чоло километр линийым, тыгак Йошкар-Олан уремлажым волгалтарыше чумыржо 15 тӱжем тулволгыдо точкан кугу кумдыкым  обслуживатла.  
 
Марий Эл Республик Вуйлатышын мер кыл ден увер виктемже
Кусарымаш - А.Андреев (газет "Марий Эл")