Прививкым ышташ торешланыман огыл

Прививкым ышташ торешланыман огыл
20.07.2021

Марий Элым вуйлатыше Александр Евстифеев республикыште у коронавирус инфекций ваштареш вакцинацийым эртарыме йодыш дене пашаче совещанийым поген. Марий Элын тазалыкым аралыме министрже М.Панькова вакцинаций кузе кайыме нерген докладым ыштен.

Министрын ойжо почеш, 13 июльлан республикыш 13,5 тӱжем утла вакцине комплект толын. I компонент дене 98 тӱжем утла еҥым вакцинироватлыме, II компонент дене – 67 тӱжем еҥ деч шукырак. Палемдыме планым 31 процентлан шуктымо. Оршанке, Юрино, Шернур, У Торъял районлаште да Йошкар-Олаште шукырак калыкым авалтыме.

60 ияш деч кугурак-влак, чылаже 38867 еҥ, I компонент дене прививкым ыштен. Тидыже вакцинироватлалтше-влакын чумыр чотыштын  39,8 процентше лиеш. Пытартыш жапыште самырык-влакат койын ушнат. Республикыште вакцинаций да мобильный пункт-влакым ситышын почмо, калыклан йӧнан лийже манын, госуслуго портал гоч ончылгоч возалташ лиеш, ешарен М.Панькова.

Марий Элым вуйлатыше вакцинаций дене кылдалтше эше ик йодышым тарватен – прививкым ыштыше-влакын данныйыштым регистрыш пуртымаш. Тачысе кечылан тудо вакцинироватлалтше-влакын чотышт дене келшен ок тол, привикым ыштышыже регистрыш пуртымо деч шукырак. «Тидым шотыш налман, мыняр вакцинным регионыш колташ але ямдылаш – Россий министерстве ты регистр гоч шымла. Самырык-влак, мутлан, молан шукышт прививкым ышташ мелын савырненыт – телефоныштышт QR-код лийшаш, тудо уке гын, тугеже вакцинацийыш каяш кӱлешыжат уке, шонат. Регистрыш пуртымо паша вакцинаций гаяк чот кӱлешан», – палемден Александр Евстифеев.

Эше ик йодыш еҥ-влакым тургыжландара: кӧн антителаже уло, прививкым ышташ шона гынат, тудлан огыт ыште. Тиде йодышлан Александр Евстифеев тыге вашештен: «Прививкым ыштыме деч ончыч тестированийыш колтат. Кӧ тидым шонен луктын? Российын тазалыкым аралыме министерствыжын позицийже вестӱрлӧ. Еҥ-влак вуйым шийыт, кӧн антителаже шуко, пуйто врач-влак прививке деч поснат илаш лиеш, маныт. Кушеч тыгайым налыныт? Федеральный практикылан тореш кайыше региональный практикым шонен лукман огыл. Мемнан задачына – коронавирус деч чумыр калыкын тӱшка иммунитетшым пеҥгыдемдаш», – каласен республикыме вуйлатыше.

Марий Эл Республикым вуйлатышын  организаций да аналитике виктемжын уверже негызеш  Л.СЕМЕНОВА ямдылен