Марий Элыште Россий сайлыме системылан 30 ий темме кечым палемденыт.
10 ноябрьыште Калык-влакын келшымаш пӧртыштышт Россий Федерацийын да Марий Элын сайлыме системыштлан 30 ий теммылан пӧлеклалтше конференций эртен.
Тушто Марий Эл правительстве председательын икымше алмаштышыже Евгений Кузьмин, Кугыжаныш Погын председательын алмаштышыже Наталья Козлова, элкӧргӧ политике, верысе шкевиктемым вияҥдыме да юстиций министр Антон Мирбадалев, айдемын праваж шотышто уполномоченный Фанис Мухаметгалиев, Мер палатын председательже Герман Дементьев, Сайлыме комиссийын йыжыҥъеҥже, политический партий-влакын регионысо пӧлкалаштын еҥже да сайлыме системын ветеранже-шамыч участвоватленыт.
Йыргешке ӱстел йыр шинчын мутланыме мероприятийым Марий Эл Республикын Сайлыме комиссийжын председательже Ирина Татаринова вӱден.
Марий Элым вуйлатышын лӱмжӧ дене правительстве председательын икымше алмаштышыже Евгений Кузьмин ойлен.
«30 ийыште республикыштына шагал огыл сайлыме кампанийым: Россий Федераций президент гыч верысе шкевиктем органлашке депутат-влакым сайлыме марте – эртарыме. Кажныжым кугу кӱкшытыштӧ организоватлыме.
Сайлыме процессын чыла участникшын пашам сайын да профессионально шуктымышт, комиссийын членже-шамычын надырым пыштымышт дене сайлыме чапле системым ыштыме.
Сайлыме комиссийын самырык избиратель-влак коклаште правовой да электоральный культурым, калыкыште политический культурым нӧлтымӧ, сайлымашым организоватлыше-шамычым профессийлан туныктымо аланыште кӱлешан пашажым эн кӱкшын аклыман», – манын Е.Кузьмин.
Правительстве председательын икымше алмаштышыже конференцийын участникше-шамычлан пашам пырля да сайын ыштымылан тауштен, сайлымашым организоватлыше-влаклан награде-шамычым кучыктен.
Йыргешке ӱстел йыр погынышо-влакым Марий Элын законым лукшо органжын лӱмжӧ дене Кугыжаныш Погын председательын алмаштышыже Н.Козлова саламлен.
«Сайлыме системын эртыме корныжо пайдале лийын, да тудо кызытат чарныде уэмдалтеш. Тачысе цифровой пунчал-влак сайлымашым палынак йӧнаным ыштеныт. Кызыт Россий гражданинлан сайлымаште шке эрыкшым ончыкташ, тидым илыме але улмо верыште, сайлыме участкыште але мӧҥгыштӧ ышташ чыла йӧн уло», – манын тудо да, регионысо сайлыме системыш надырым пыштыше-шамычлан тауштен, пеҥгыде тазалыкым, пиалым, пашаште чапле лектыш ден сеҥымашым тыланен. Тыгак Марий Элын Сайлыме комиссийжын аппаратыштыже пашам ятыр ий да сайын ыштыше, кӱкшӧ профессионализмым ончыктышо-влаклан Кугыжаныш Погынын таумутшым кучыктен.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
