Правительстве пӧртыштӧ Марий Элыште у тӱҥ федерал инспектор П.Логинов дене палдареныт

Правительстве пӧртыштӧ Марий Элыште у тӱҥ федерал инспектор П.Логинов дене палдареныт
24.10.2014
Тушто республикым вуйлатыше Л.Маркелов, правительстве член, министр-влак, кучемын федерал органлажын территориальный подразделенийже, силовой структур, муниципальный образований-влакын вуйлатышышт лийыныт. У федерал инспектор дене Россий президентын Юл кундем федерал округышто полномочный представительжын алмаштышыже О.Мельниченко палдарен. «Павел Логинов изи огыл илыш опытым поген. Аппаратыштына пашам ыштыше еҥ семын округышто мо ышталт шогымым сайын пала. У должностьышто шкенжын эн сай профессиональный ден айдеме качествыжым тичмашын почеш манын ӱшанем», - манын тудо.
 
- Марий Эл шке йӱлаж дене ойыртемалтеш, поян историйже да тӱвыраже уло. Пытартыш ийлаште республик сайын вияҥ толеш, чот вашталтын, моло дене таҥастараш лийдыме сынже кумылым савыра. Тыгай вашталтыш-влак дене чыла регионжак моктанен огеш керт, - палемден П.Логинов да ӱшаныме кугу сомылым сайын шукташ сӧрен.
 
Л.Маркелов у федерал инспекторым саламлен, тудлан йӧнештышым тыланен. Павел Логинов республикыште шкеж нерген сай шарнымашым кода манын ӱшанен ойлен.
 
П.Логиновын паша корныж нерген кодшо вӱргечын лекше газетыштына палдаренна ыле. Пытартыш ийлаште тудо РФ президентын Юл кундем федерал округышто полномочный представительжын аппаратшын кӧргӧ паша политике шотышто департамент начальникын алмаштышыже должностьышто тыршен. 2013 ий сентябрь гыч полпред аппаратын общественный проект-влакым илышыш пуртымо шотышто департаментшым вуйлатен. 21 октябрьыште тудым Марий Элыште тӱҥ федерал инспекторлан шогалтеныт.
 
Тӱҥ федерал инспекторын пашаже исполнительный кучемын федерал органже-влакын территориальный подразделенийыштын пашаштым ваш келыштарыме, нунын да субъектын кугыжаныш кучем органже-влак, политический партий, мер да религиозный ушем-влак коклаште вашкылым ыштыме, правам аралыше орган-влакын пашаштын пайдалыкыштым шымлыме дене кылдалтын. 
 
Марий Эл Республик Вуйлатышын мер кыл ден увер виктемже
Кусарымаш - Л.Иванова (газет "Марий Эл")