Поче-поче почылтыт

Поче-поче почылтыт
09.10.2014
Марий Элым вуйлатыше Л.Маркелов Звенигово районысо Шолэҥерыште йочасадым почмаште лийын.
 
Ты посёлкышто коло ий наре садик лийын огыл. Ондаксыжым чот тоштеммылан кӧра петыреныт. Ача-ава-влак шочшыштым лу утла меҥге тораште верланыше Красногорскийыш але Суслоҥгерыш коштыктеныт. Сандене тыште йоча учрежденийым чоҥымым правительстве контрольышко налын, да тудым кӱчык жапыште нӧлтен шынденыт.
 
Кок пачашан садикыште куд группо верланен, музыкальный ден физкультур зал, медицине кабинет улыт. Чоҥышо-влак икшыве-влаклан «шокшо» кӱварым ыштен пуэныт. Объектым чоҥаш федерал да республикын оксажым кучылтмо.
 
Л.Маркелов группылаште изи ӱдыр-рвезе-влак ситышын лийыт мо манын йодын. «Садикыш кошташ кумылан-шамыч шукын улыт», - палемден вуйлатыше В.Наумова. Тудо чапле йочасадым чоҥымылан тауштен, икшыве-влаклан тыште сай лийже манын, воспитатель-шамыч чылажымат ышташ тӱҥалыт манын сӧрен.
 
Республикым вуйлатыше тышеч Илеть посёлкыш каен. Тушто у ФАП почылтын. Медколледжым тунем пытарыше А.Лысенко ондакше олаште пашам ышташ кодаш шонен, но шке кундемыштыже у фельдшер-акушер пунктым чоҥаш тӱҥалме нерген пален налмекше, тышке фельдшерлан ышташ толын.
 
У ФАП-ым Л.Маркелов изи поликлинике дене таҥастарен. Тыште чылажат уло: фельдшерын, педиатрын, акушерын кабинетышт, процедурный, перевязкым, прививкым ыштыме, физиолечений пӧлемла.
 
- У ФАП-ым чоҥымо мыланна пайрем гай. 1954 ийыште нӧлтымӧ тошто пу оралтыште пашам сайын ышташ йӧн лийын огыл. Ынде тышке ола, район гыч специалистым ӱжаш намыс огыл, - палемден рӱдӧ райбольницын тӱҥ врачше С.Букатина.
 
Фельдшер-акушер пункт Кирпичный, Трубный, Илеть посёлкылаште илыше тӱжем наре еҥлан медицине полышым пуэн шога. Тыште 126 йоча уло.
 
Кок арня гыч Звенигово районыштак, Поянсолаште, эше ик ФАП почылтшаш. Шушаш ийыште Красногорский посёлкышто стадионым, Звениговышто йочасадым чоҥаш палемдалтеш. 
 
Марий Эл Республик Вуйлатышын мер кыл ден увер виктемже
Кусарымаш - Л.Иванова (газет "Марий Эл")