9-13 мартыште Йошкар-Оласе «Марий Эл» ий полатыште фигурный мунчалтымаш дене «Мемориал С.А.Жука» всероссийский таҥасымаш эртен.
Ты гана ий ӱмбалне Моско, Санкт-Петербург, Татарстан кундемла, Красноярск край гыч изирак ийготан спортсмен-влак мастарлыкыштым ончыктеныт, кӱчык да произвольный программылаште тӱрлӧ элементым чын да моторын ыштымышт дене ойыртемалтыныт.
Марий Эл гыч Наиль Сагадулин ий ӱмбалне мастрлыкшым ончыктен.
Таҥасымашке Олимпийский чемпион Евгений Плющенко толын. Тудо ты турнирыш шке командыжым участвоватлаш конден. Республикын спорт да туризм министрже Лидия Батюкова лумлӧ спортсмен дене вашлийын да майыште патриотизм шӱлышан кугу мероприятийым эртараш кутырен келшеныт. Евгений Плющенко регионысо спорт инфраструктурым ончен лектын, кӱкшын аклен.
Марий Эл вуйлатыше Ю.Зайцеват Евгений Плющенко дене вашлийын.
– Фигурный мунчалтымашын легендыжым, тудын усталыкшым моткоч пагалем да самырык спортсмен-шамычлан тудын гай сеҥымашыш шуаш тыланем, – спортсмен дене войзалтме фотоэшыже палемден регион вуйлатыше.
Тыгак Е.Плющенкон регион дене пырля пашам ыштымыш шотышто каҥашеныт. Ончыкшым тыште олимпийский чемпионын «Ангелы Плющенко» школын филиалжым почаш, шонат.
Республикыште тыгай кӱкшытан турнир ик гана веле огыл эртаралтеш. Тидыже тыгак фигурный мунчалтымашым вияҥдымаште эше ик сай йӧн, чапле ошкыл.
Е.Эшкинина.
Футбол
Эн тале лийыныт
Кажне кундемыште спортын тӱрлӧ видше дене турнир, таҥасымаш-влак эртаралтыт. Кызыт кугу тӱткышым теле видлан ойырат гынат, футболат ӧрдыжеш огеш код. Мутлан, шукерте огыл Шернур кундемыште ты вид дене теле турнирын чемпионатше иктешлалтын. Тушто икымше верым «Союз-Кукнур» футбол клуб налын. Мо оҥайже, теле чемпионатыште эн опытан модшым палемденыт, «Акпатыр» команде гыч Валентин Яковлевлан шарнымашеш кубок ден дипломым кучыктеныт. «ССШ №1» команде гыч Арсений Рыбаков эн самырык модшо семын ойыртемалтын. Тыгак эн сай больельщикым палемденыт. Тиде Михаил Смоленцев. Эн сай капка орол – «Союз-Кукнур» сборный гыч Андрей Бирюков, эн сай модшо – «Нива» команде гыч Павел Паймаков, эн сай бомбардир – «Автодобро» команде гыч Алексей Новосёлов.
А 4 мартыште Шернур районын тале футболистше-шамычым шарныме лӱмеш таҥасымаш эртен. Сеҥыше – «Автодобро» команде.
