Пембыште – у ФАП

Пембыште – у ФАП
27.10.2014
Марий Элым вуйлатыше Л.Маркелов Медведево районысо Пембе да Песчаный посёлкылаште илыше-влакл Верысе калыклан тиде медучреждений чынжымак кугу пӧлек лийын. Ондакше тудо шуко пачашан пӧртысӧ кум пӧлеман пачерыште верланен. У фельдшер-акушер пункт тӱҥалтыш медполышым пуаш кӱлшӧ чыла оборудований, мебель да оргтехнике дене пойдаралтын.
 
- Тений ме чылаже латвич ФАП-ым нӧлтен шынденна, вес ийын колым чоҥаш палемдыме, а 2016 ийыште  эше коло вич фельдшер-акушер пункт ешаралтеш, - палемден Л.Маркелов. - Чыла еҥ, олаште илышат, ялысат, сай медполышым налшаш, вет лачак ял, села, посёлко гыч илыш тӱҥалеш. Кызыт ме Юринысе эмлымверым чоҥена, ончыкыжым Козьмодемьянскыште тӱҥалаш шонена. Йошкар-Олаште чапле йоча поликлинике лишыл жапыште омсажым почшаш, тудо пӱтынь республикысе икшыве-влаклан медицине полышым пуаш тӱҥалеш.
 
Пембысе амбулаторийыште фельдшерын посна пӧлемже уло, тыштак смотровой, прививкым ыштыме, процедур кабинет-влак верланеныт, таза икшывылан, черлылан посна вер ойыралтыныт. ФАП-ыште калыклан эмым ужалыме пункт пашам ышта.
 
Эмлыме у оралтым «Марспецмонтаж» ООО-н чоҥышыжо-шамыч пел ийыште нӧлтен шынденыт.  «Республикыште тиде ик эн сай фельдшер-акушер пункт манын каласен кертам, - палемден Л.Маркелов. - Чоҥышо-влак чот тыршеныт, чылажымат сайын, лачымын ыштеныт».
 
Ончыкыжым тышке тӱшка практикан врач пашаш толшаш. Тудо, фельдшер, ФАП-ысе моло медпашаеҥ тӱжем нылшӱдӧ еҥын тазалыкше верч тыршаш тӱҥалыт.
 
У ФАП-ым чоҥымо паша республикын бюджетшылан лу миллион теҥгешке шуын. «Здравоохраненийым вияҥдымаш» кугыжаныш программым илышыш шыҥдарен толын, тыгай медучреждений-влакым чоҥымаш ялысе медициным саемдымаште сай ошкыл лиеш – тыге шотлат регионысо кучем-влак.
 
Марий Эл Республик Вуйлатышын мер кыл ден увер виктемже
Кусарымаш - Л.Иванова (газет "Марий Эл")